Este domingo, das 10.00 ás 15.00 horas, o Campo da Leña acolle unha vez máis o mercado ecolóxico municipal, unha iniciativa coa que o Concello busca dinamizar os espazos públicos ao aire libre nos barrios da cidade, cun amplo abano de actividades de ocio que aparellan, ademais, a venda de produtos de proximidade.

Mañá, a programación da xornada inclúe un espazo de dinamización infantil ideado para que o gocen as crianzas, que estará aberto ata a conclusión do mercado, ás 15.00 horas. Entre medias, das 11.30 ás 12.30 horas, as e os pequenos poderán participar nun obradoiro creativo no que a rapazada aprenderá a fabricar as súas propias combas de salto mediante materiais reciclados. Haberá 15 prazas como máximo no taller, con inscrición previa no propio mercado, xa desde primeira hora. O acceso é de balde.

Ademais, este domingo tamén haberá tempo para coñecer polo miúdo a obra da escritora coruñesa Pilar Alvarellos, que protagonizará un curso de literatura de proximidade aberto a todos os públicos, das 12.00 ás 12.45 horas.

Os barrios, protagonistas no calendario dos mercados ata finais de ano

A programación dos mercados ecolóxicos e sostibles continuará nas vindeiras semanas en máis barrios da Coruña. Ademais de volver ao Campo da Leña, á praza da Tolerancia, en Labañou, e ao parque Europa, o calendario de eventos previstos ata finais de ano inclúe o desenvolvemento dos mercados no paseo das Pontes, a praza de Azcárraga, a praza de Vigo, o parque da Tirolesa de Novo Mesoiro e a praza de San Cristovo, nos Mallos.

Desta forma, o Goberno de Inés Rey amplía o radio de acción desta iniciativa a máis distritos da cidade, baseándose na boa experiencia acadada polos mercados ecolóxicos municipais nas súas localizacións habituais e atendendo tamén ás propias solicitudes da veciñanza dos diversos barrios da Coruña.