A dous meses da proba, aumenta o ritmo de inscricións de cara á XX edición da carreira popular Coruña10, que terá lugar o vindeiro 4 de outubro e que conta xa con máis de 1.600 persoas anotadas entre as diversas categorías, só dúas semanas despois da apertura do prazo.

Neste sentido, a vindeira semana será a última na que as persoas interesadas en participar na carreira poderán inscribirse coa tarifa reducida, de 10 euros. Será ata o vindeiro domingo 16, a través da páxina web de Carreiras Galegas. A partir de aí, abrirase o prazo ordinario, ata o 25 de setembro (15 euros) e, xa posteriormente, o prazo extraodinario, entre os días 26 e 27 de setembro (25 euros), sempre e cando queden prazas dispoñibles.

A oferta inicial lanzada polo Concello e a Federación Galega de Atletismo (FGA) foi de 3.000 prazas. Cómpre subliñar que, tal e como se anunciou días atrás, en función da demanda existente está previsto habilitar unha listaxe de agarda para emitir, posteriormente, unha oferta de dorsais extra.

O concelleiro de Deportes, Manuel Vázquez, lembrou que, ademais, "á hora de inscribirse na XX Coruña10 haberá bonificacións especiais para persoas desempregadas, maiores de 65 anos e tamén para familias numerosas".

O goteo de confirmacións de atletas élite continuará nas vindeiras semanas

O actual campión de España nos 1.500 metros, o viveirense Adrián Ben, será un dos atletas élite que tomará parte na saída da carreira do 4 de outubro. Ao deportista galego, galardoado recentemente coa Medalla Castelao, sumaranse proximamente máis referentes do atletismo, que o Concello e a Federación Galega de Atletismo irán anunciando de forma progresiva nas vindeiras semanas.