A Coruña reforza o seu liderado como faro cultural de Galicia acollendo esta noite o concerto de Megadeth no Coliseum dentro da programación do Coruña Sounds, que hoxe presentou o seu cartel oficial no restaurante Árbore da Veira.

O concelleiro de Cultura e Turismo, Gonzalo Castro, asistiu á presentación e agradeceu á organización do ciclo musical que "siga apostando pola nosa cidade como sede para albergar a bandas de tanta envergadura como Megadeth, o que nos mantén na lista de cidades españolas con máis éxito para acoller eventos deste estilo". Ademais, Castro fixo fincapé na capacidade de descentralización da oferta cultural que impulsa a alcaldesa, Inés Rey, na cidade, cunha programación anual para todos os gustos e públicos. "O éxito da Coruña neste ámbito non é sorte, é traballo e constancia por parte do Goberno de Inés Rey para que a cidade xogue noutra liga en canto a cultura se refire", dixo.

Megadeth, a formación liderada por Dave Mustaine, ofrecerá un espectáculo único na cidade ao ser esta a súa xira de despedida despois de catro décadas de traxectoria. Está considerada unha das bandas máis influíntes da historia do metal, formando parte do Big Four do thrash xunto a Metallica, Slayer e Anthrax.

Máis confirmados: Alejandro Sanz e Víctor Manuel

O ciclo continuará co concerto de Alejandro Sanz o vindeiro 18 de xullo no peirao de Batería tras arrasar en Latinoamérica coa súa xira '¿Y ahora qué?'. Sanz saltou á fama en 1991 co seu disco 'Viviendo deprisa', aínda que foi no 1997 cando se lanzou á fama co álbum 'Más', considerado o disco máis vendido da historia de España. Ademais de colaborar con artistas como Alicia Keys, Tony Bennet, Alejandro Fernández ou Shakira, posúe 24 Latin Grammy e 4 estadounidenses.

Seguiralle o paso outro dos artistas de máis éxito no noso país como Víctor Manuel. A súa actuación está programada para o 12 de decembro no Palacio da Ópera. É un dos cantautores e produtores españois máis respectados do país e consolidouse como unha das principais voces da transición á democracia. O tema 'Sólo pienso en ti' ou 'La puerta de Alcalá', composto polo grupo Suburbano, convertérono nunha icona.