CONSIDERACIÓNS XERAIS

O Concello da Coruña e a Federación Galega de Atletismo organizarán o 9 de febreiro de 2025 na Coruña o XVII Medio Maratón Coruña21, cunha distancia homologada pola Real Federación Española de Atletismo de 21.097,50 metros.

A proba, incluída no calendario oficial das competicións da FGA e a RFEA, disputarase a través dun circuíto totalmente urbano.

A proba comezará ás 09.30 horas A.M. e a liña de saída estará situada á altura do Obelisco, no Cantón Grande. 

A proba levarase a cabo sobre unha distancia de 21.097,50 metros. O percorrido estará medido e homologado pola Real Federación Española de Atletismo e transcorrerá sobre asfalto na súa totalidade.

A ruta estará debidamente sinalizada e terá marcados todos os puntos quilométricos. A carreira realizarase pola vía de tráfico rodado en todo o seu percorrido, agás as zonas peonís sinalizadas como circuíto. Está prohibido usar como zonas de carreira as beirarrúas, glorietas, áreas axardinadas, e todo o que exceda os límites do circuíto sinalizado.

Incumprir esta norma, así como recortar o trazado oficial, pode implicar a descualificación das persoas infractoras.

A organización poderá modificar o percorrido por causas alleas e/ou de forza maior.

O circuíto publicarase de xeito previo á realización da proba na web de inscricións www.carreirasgalegas.com e no portal web municipal www.coruna.gal/carreiraspopulares

A carreira estará controlada polo Comité Nacional de Xuíces da RFEA e o Comité Galego de Xuíces da FGA.

Todas as reclamacións deberán serlles feitas verbalmente á xuíza ou xuíz árbitro da proba como límite ata 30 minutos despois da publicación dos resultados oficiais.

A cronometraxe realizarase mediante o sistema de chip-dorsal. Haberá varios puntos de control de chips ao longo de todo o percorrido. As persoas participantes que non cumpran co paso por todos os puntos poderán ser descualificadas e como consecuencia non aparecerán nos resultados finais.

Os dorsais con chip integrado son persoais, intransferibles e exclusivos desta carreira e deben colocarse na parte anterior do corpo, de maneira totalmente visible, sen obstrucións e sen dobreces. Así deberá levarse durante o transcurso da proba.

Os dorsais contarán cun código QR a través do cal as persoas que cheguen á meta (finishers) poderán consultar os seus rexistros de forma instantánea, a través deste sistema.

A organización non admitirá persoas corredoras que non estean inscritas ou que corran sen este dorsal-chip. Impediráselles ter acceso á proba respectando os dereitos daquelas persoas regulamentariamente inscritas. Non se permitirá a participación co dorsal-chip correspondente a outra carreira ou persoa, con máis dun dorsal-chip, dorsal falsificado ou outro que non sexa o oficialmente entregado pola organización.

Calquera infracción destas regras implicará a descualificación das persoas afectadas na proba. A organización reservarase o dereito de excluílas da participación en futuros eventos.

As persoas participantes terán que competir cos seus propios medios físicos e naturais, sen axudas externas físicas ou materiais de ningún tipo, coa única excepción das persoas corredoras en cadeira de rodas debidamente rexistradas e que cumpran as normas da World Para Athletics. Calquera dúbida a respecto diso deberá consultarse coa organización antes de facer a inscrición a través do correo electrónico info@carreirasgalegas.com.

Non está permitido o acompañamento en ningún momento da proba por ningún vehículo alleo á organización, nin bicicletas, patíns ou persoas non rexistradas na proba que poidan acompañar, avituallar ou marcarlles ritmos ás persoas participantes.

Ao mesmo tempo, non se permite a participación con coches ou cadeiras de bebés, nin correr acompañados destes en ningún momento, coa única excepción dos carros de running*.

Tampouco está permitida a participación con animais, nin correr acompañados destes en ningún momento.

*A participación con carro de running deberá estar xustificada unicamente para levar unha persoa con discapacidade motora grave (que non lle permita á persoa con discapacidade trasladarse polos seus propios medios físicos), entendendo nestes casos como participante sempre a persoa que empurra o carro (dentro da categoría que lle corresponda), e non a persoa que vai no carro.

Igualmente, será obrigatorio acreditar a discapacidade da persoa que vai no carro, enviando copia da tarxeta acreditativa da discapacidade á organización, de xeito que quede acreditado o envío, ao correo electrónico info@carreirasgalegas.com. A inscrición desta persoa, que irá con dorsal sen chip, será gratuíta. Para iso deberán contactar coa organización a través do correo electrónico info@carreirasgalegas.com.

Calquera infracción destas características poderá supoñer a descualificación da persoa  participante.

A organización resérvase a facultade de retirar da proba a/o atleta que manifeste un mal estado físico, que non lle facilite á organización a documentación que se lle requira, as e os corredores que non respecten as indicacións da Policía Local, Protección Civil, xurado, servizos médicos ou membros da organización debidamente identificados.

As ou os xuíces da proba terán a facultade de descualificar a persoa infractora que non leve visible o seu dorsal, que o manipule e/ou llo ceda a outra persoa, altere os datos facilitados á organización con respecto aos que figuren no seu DNI ou ficha federativa, non complete o    percorrido, ou incumpra calquera outra norma contemplada nas normas da FGA, RFEA e WA para probas en ruta.

As persoas corredoras descualificadas non terán opción a premios nin trofeos.

O peche de control da carreira farase 2 horas e 30 minutos despois da súa saída. Ademais, establecerase un tempo límite de 1 hora e     15 minutos para o paso polos 10 km.

Ao se cumprir estes tempos, tanto para o primeiro tramo da carreira como para a distancia total, todas as persoas que aínda continúen no circuíto deberán retirarse e trasladarse á zona peonil.

Serán consideradas "fóra de carreira" e "non figurarán nas clasificacións". Se deciden continuar, estarano facendo exclusivamente baixo a súa responsabilidade, e deberán cumprir en todo o momento coa normativa de tráfico e seguridade viaria.

CATEGORÍAS E INSCRICIÓN

• Sub 20: nadas/os en 2006 e 2007
• Sub 23: nadas/os en 2003, 2004 e 2005
• Sénior: nadas/os desde 2002 ata a categoría Máster
• Máster 1: de 35 a 39 anos cumpridos no día da proba
• Máster 2: de 40 a 44 anos cumpridos no día da proba
• Máster 3: de 45 a 49 anos cumpridos no día da proba
• Máster 4: de 50 a 54 anos cumpridos no día da proba
• Máster 5: de 55 a 59 anos cumpridos no día da proba
• Máster 6: de 60 a 64 anos cumpridos no día da proba
• Máster 7: a partir de 65 anos cumpridos no día da proba
• Atletas con discapacidade*: nadas/os en 2006 e anos anteriores

*Atletas con discapacidade: establécense tres categorías para atletas con discapacidade:

1. Atletas en cadeira de rodas: que non teñan mecanismos nin engrenaxes que axuden a impulsar estas. Tan só está permitido o impulso cos brazos sobre o aro adherido á roda. Non está permitida a participación en handbike
2. Persoa con discapacidade visual
3. Persoa con discapacidade intelectual

No momento da inscrición débenlle comunicar esta circunstancia á organización, así como se desexan entrar na clasificación de atletas con discapacidade. No caso de non indicalo figurarán na  táboa xeral de tempos.

Para acreditar a pertenza a algunha destas categorías deberá serlle remitida, dentro do prazo de inscrición da proba, unha copia da tarxeta acreditativa de discapacidade á organización, concretamente, ao correo electrónico info@carreirasgalegas.com.

As persoas participantes con discapacidade visual ou intelectual farán constar os apoios que necesitan para participar na carreira nas mellores condicións posibles.

Permitirase un máximo de 2 guías para os e as atletas con discapacidade visual. O uso de guías ou, no caso de participantes con discapacidade intelectual, de atletas de apoio, debe comunicárselle con antelación á Federación Galega de Atletismo, no correo electrónico info@carreirasgalegas.com, así como o punto quilométrico exacto onde se van situar os/as guías das persoas corredoras con discapacidade visual para facer a remuda.

A participación das persoas guías e das persoas de apoio, que irán sen chip, será gratuíta, para o cal deberán contactar coa organización a través do correo electrónico info@carreirasgalegas.com.

Para optar a trofeo na categoría de atletas con discapacidade será necesario inscribirse nesa categoría.

1.- A través da pasarela de pago inserida na páxina web da Federación Galega de Atletismo www.carreirasgalegas.com. Estará operativa desde a publicación deste regulamento ata as 23.59 horas do martes 20 de febreiro de 2025.

Cota e prazos de inscrición:

• Prazo ordinario: ata o domingo 26 de xaneiro: 20 €
• 2.º prazo: desde o luns 27 de xaneiro ata o domingo  2 de febreiro: 30 €
• Prazo extraordinario: desde o luns 3 de febreiro ata o martes 4 de febreiro: 40 €

2.- Inscrición presencial:

Os/ as atletas serán debidamente informados das datas e da localización

3.- Bonificacións: 50% de desconto para maiores de 65 anos, persoas usuarias do Carné Xove e persoas desempregadas. Para acreditar estas circunstancias será suficiente cunha declaración responsable, que se entenderá realizada no momento no que se marque a opción "solicito bonificación", no formulario de inscrición en liña ou na folla de inscrición presencial. Ademais é necesario enviarlle á Federación Galega de Atletismo os documentos que se detallan a continuación, mediante un correo electrónico a info@carreirasgalegas.com:

• Maiores de 65 anos: fotocopia do DNI
• Persoas usuarias do Carné Xove: fotocopia do DNI e do Carné Xove
• Persoas desempregadas: fotocopia do DNI e Informe de períodos de altas e baixas, expedido polo Servizo  Público de Emprego (INEM) antes do día da inscrición na carreira ou fotocopia da tarxeta de desemprego.

Devolverase a cota de inscrición só no caso de lesión e/ou enfermidade, sempre e cando se presente un xustificante no que non aparezan datos de saúde, con polo menos 10 días de antelación a celebración da proba, enviando un correo electrónico a  info@carreirasgalegas.com.

SERVIZOS ÁS PERSOAS PARTICIPANTES

PREMIOS E TROFEOS

Xeral:

POSTO	PREMIO	CONDICIÓN*
		HOMES	MULLERES
1º	1500 €	Realizar 1 h 05:00 ou menos	Realizar 1 h 15:00 ou menos
2º	1000 €	Realizar 1 h 05:00 ou menos	Realizar 1 h 15:00 ou menos
3º	750 €	Realizar 1 h 05:00 ou menos	Realizar 1 h 15:00 ou menos
4º	500 €	Realizar 1 h 05:00 ou menos	Realizar 1 h 15:00 ou menos
5º	350 €	Realizar 1 h 05:00 ou menos	Realizar 1 h 15:00 ou menos

* No caso de non cumprir esta condición, aplicarase unha rebaixa do 50 %.

Atletas con nacionalidade española (premio non acumulable) ⁽¹⁾:

POSTO	PREMIO	CONDICIÓN*
		HOMES	MULLERES
1º español/a	600 €	Realizar 1 h 08:00 ou menos	Realizar 1 h 18:00 ou menos
2º español/a	400 €	Realizar 1 h 08:00 ou menos	Realizar 1 h 18:00 ou menos
3º español/a	200 €	Realizar 1 h 08:00 ou menos	Realizar 1 h 18:00 ou menos

* No caso de non cumprir esta condición, aplicarase unha rebaixa do 50 %.

1. Considerarase atleta de nacionalidade española quen presente o correspondente DNI.

Atletas galegas/os (premio non acumulable) ⁽²⁾:

POSTO	PREMIO	CONDICIÓN*
		HOMES	MULLERES
1º galego/a	600 €	Realizar 1 h 10:00 ou menos	Realizar 1 h 20:00 ou menos
2º galego/a	400 €	Realizar 1 h 10:00 ou menos	Realizar 1 h 20:00 ou menos
3º galego/a	200 €	Realizar 1 h 10:00 ou menos	Realizar 1 h 20:00 ou menos

* No caso de non cumprir esta condición, aplicarase unha rebaixa do 50 %.

1. Consideraranse atletas galegos/as os/as empadroados/as ou nados nalgún Concello de Galicia. Para poder recibir o premio, os/as atletas galegos/as premiados/as deberán remitir o seu certificado de empadroamento ou documentación que acredite o lugar de nacemento ao enderezo de correo electrónico secretaria@atletismo.gal

Atletas coruñesa/és (premio non acumulable) ⁽³⁾:

POSTO	PREMIO	CONDICIÓN*
		HOMES	MULLERES
1º coruñés/a	300 €	Realizar 1 h 15:00 ou menos	Realizar 1 h 30:00 ou menos
2º coruñés/a	200 €	Realizar 1 h 15:00 ou menos	Realizar 1 h 30:00 ou menos
3º coruñés/a	150 €	Realizar 1 h 15:00 ou menos	Realizar 1 h 30:00 ou menos

* No caso de non cumprir esta condición, aplicarase unha rebaixa do 50 %.

(3) Consideraranse atletas coruñeses/as os/as empadroados/as ou nados no Concello da Coruña. Para poder recibir o premio, os/as atletas coruñeses/as premiados/as deberán remitir o seu certificado de empadroamento ou documentación que acredite o lugar de nacemento ao enderezo de correo electrónico secretaria@atletismo.gal

PREMIO ESPECIAL RÉCORD DA PROBA (premio acumulable):

A/o atleta que gane a carreira e que bata o récord da proba tanto na categoría masculina (1 h 01' 40'') como na feminina (1 h 11' 16'') obterá un premio económico de 1.000 euros.

Os premios en metálico non serán acumulativos, con excepción do récord da proba. No caso de duplicidade, aboarase a contía máis alta. Para poder recoller os premios, será necesario xustificar documentalmente o ano de nacemento das persoas participantes por medio do DNI as/os españois, ou do documento legal en vigor (pasaporte) as/os estranxeiras/os. Todos os premios estarán suxeitos ás    retencións legais vixentes.

Co obxecto de poder revisar as condicións estipuladas e atender calquera posible reclamación, a organización resérvase a posibilidade de entregar os premios en metálico a partir do luns seguinte á data da competición. No caso de realizarse un control de dopaxe, os premios económicos quedarán retidos ata a súa resolución oficial.

Outorgaránselles os trofeos no palco da entrega de premios ás tres primeiras persoas clasificadas    de cada unha das categorías indicadas no artigo 10 deste regulamento.

O horario da entrega de trofeos será unha vez que conclúa o derradeiro participante nela. As/os atletas deberán situarse na zona próxima á entrega de trofeos no momento no que pola megafonía se faga o anuncio do seu comezo, así como estar pendentes da chamada a cada unha  das categorías.

Con carácter xeral, as/os atletas que non se presenten no momento da entrega do seu trofeo, perderán o dereito a recollelo. Exclusivamente poderán subir ao podio as persoas nomeadas. Non se lle entregará o trofeo a ninguén que non sexa a/o propia/o atleta.

Agradecémoslles ás persoas responsables dos clubs que teñan constancia de que a/o atleta non estea presente que o comuniquen na zona do palco de entrega de trofeos o antes posible para evitar agardas innecesarias.

Aquelas persoas que poidan alegar unha causa xustificada pola súa ausencia no momento da entrega deberanse poñer en contacto co Servizo Municipal de Deportes, durante un prazo máximo  de 15 días, onde se custodiarán os trofeos non recollidos. Se non se recollen no prazo sinalado, entenderase que renuncian a eles.

RESPONSABILIDADE E PROTECCIÓN DE DATOS

A organización non se fai responsable dos danos que puideren causar ou causarse as persoas participantes por imprudencias ou descoidos delas mesmas.

A persoa participante declara, baixo a súa responsabilidade, que realiza o oportuno recoñecemento médico que lle permite estar en condicións óptimas para realizar a proba, e exime a organización da dita responsabilidade.

A organización dispón dun seguro de accidentes e responsabilidade civil que cubrirá os incidentes inherentes á proba.

Todas as persoas corredoras, ao realizaren a inscrición, aceptan a publicación do seu nome e imaxe nas clasificacións, medios de comunicación e/ou Internet. Mediante a inscrición, o/a participante consente expresamente que os seus datos sexan utilizados polo Concello da Coruña e a Federación Galega de Atletismo para comunicacións sobre as súas actividades.

En todo o caso, de conformidade co establecido polo artigo 5 da LOPD, infórmase de que os datos de carácter persoal declarados pasarán a formar parte de:

1. O ficheiro denominado INSTALACIÓNS DEPORTIVAS, do que o responsable do tratamento será o Concello da Coruña, dos que as finalidades e usos previstos serán os seguintes: xestión centralizada das instalacións deportivas municipais, das actividades impartidas nelas e do uso de instalacións. Todas as persoas participantes ao realizar a inscrición aceptan a publicación do seu nome e imaxe nas clasificacións, medios de comunicación e/ou Internet. Autorízase a tomar imaxes sempre que se utilicen para a promoción e difusión das ditas actividades, así como a utilización do móbil e correo electrónico como forma de aviso e comunicación por parte do Servizo Municipal de Deportes. Os dereitos de acceso, rectificación, cancelación e oposición aos datos persoais rexistrados neste ficheiro poderanse exercer ante o Rexistro Xeral do Concello da Coruña (praza de María Pita, 1) nos termos establecidos nos artigos 15, 16 e 17 da LOPD.
2. O ficheiro denominado ATLETAS, do que o responsable do tratamento será a Federación Galega de Atletismo, ten como finalidade a relación das e dos atletas federados en competicións oficiais, elaboración da clasificación e estatísticas.

Esta proba pertence ao calendario oficial da Federación Galega de Atletismo e da Real Federación Española de Atletismo e, mediante a súa inscrición, as persoas corredoras consenten expresamente que os seus datos básicos (nome, apelidos, NIF / NIE / pasaporte, data de nacemento, sexo e código postal de residencia) lle sexan enviados á Real Federación Española de Atletismo para xestionar as licenzas de día, resultados e clasificación. A posesión da licenza  garante que a persoa corredora participa cuberta por un seguro de responsabilidade civil e de accidentes.

Os dereitos de acceso, rectificación, cancelación e oposición aos datos persoais rexistrados neste ficheiro poderanse exercer ante a Federación Galega de Atletismo (avda. Glasgow s/n. Complexo Deportivo de Elviña), nos termos establecidos nos artigos 15, 16 e 17 da LOPD.

A inscrición na carreira implica a plena aceptación do presente regulamento.

CONSIDERACIÓN FINAL

A organización resérvase o dereito de realizar algún cambio no presente regulamento se así o considerase, e deberá comunicalo na web e na información ás persoas participantes.

En todo caso, e por interese deportivo, a organización resérvase o dereito de convidar a atletas concretos/as, mulleres ou homes con marcas ou traxectoria deportiva que poidan aumentar a calidade da carreira.

Todo o non reflectido no presente regulamento rexerase polas normas da FGA, RFEA, WA e ICP.

A inscrición para participar na proba presupón a aceptación deste regulamento e a expresa renuncia a calquera reclamación futura por mor das modificacións regulamentarias que poidan acontecer.