Coruña21 ultima os seus preparativos para realizar este domingo a súa XIV edición, que este ano superou as 1.400 persoas inscritas. A proba, sobre circuíto homologado a unha volta, poñerá ao servizo dos corredores e das corredoras un nutrido número de servizos para prover das maiores comodidades aos seus e ás súas atletas.

Recollida de dorsais e chips: as e os atletas poderán dirixirse desde o venres á quinta planta de El Corte Inglés da rúa Ramón y Cajal. Alí está situado o departamento de Deportes. O prazo de recollida comeza o venres ás 11.00 horas e termina ás 21.30 horas. O sábado o horario será desde as 10.00 ata as 21.30 horas. Ademais, habilitarase unha entrega de dorsais e chip o día da carreira das 8:00 ás 9:00 h. Rógaselles ás persoas corredoras, con todo, que na medida do posible os retiren antes para evitar aglomeracións.

Ao mesmo tempo e para evitar a concentración de persoas, no espazo habilitado establecerase un servizo de cita previa, polo que se procederá a envar o formulario para pedir a cita a todos os corredores e corredoras que formalizasen a inscrición.

Quendas de saída: considerando o protocolo FISICOVID da Federación Galega de Atletismo, realizaranse quendas de saída de 300 atletas, en función dos tempos rexistrados na inscrición. As quendas sairán cun intervalo de 1 minuto.

Os caixóns corresponderanse con cinco cores indicativas que lucirán os/as corredores/as nos seus dorsais.

Clasificación: os dorsais contarán cun código QR a través do cal as persoas que cheguen á meta poderán consultar os seus rexistros de forma instantánea.

Vídeo de chegada: os/as atletas, ao consultaren os seus resultados, poderán acceder á gravación da súa chegada á meta en www.carreirasgalegas.com

Servizo de gardarroupa: estará dispoñible para todos/as os/as corredores/as nunha carpa situada na zona do Obelisco desde as 08.00 ata as 13.00 horas.

Sinalética da carreira: en Coruña21 todos os puntos quilométricos estarán sinalizados. Así mesmo, tamén haberá indicacións a 100 metros dos puntos de avituallamento que informarán os/as corredores/as da súa proximidade.

O paso polo Km 10 contará cun punto de control de cronometraxe, xa que ao ser un circuíto homologado, a marca no Km 10 será válida para todas as persoas que finalicen a carreira.

Avituallamento: seguindo as normas da Federación internacional, en Coruña21 estableceranse un total de catro pasos de avituallamento líquido durante o trazado, situados cada 5 kms. O primeiro deles estará localizado na rúa Manuel Murguía á altura da rotonda do colexio das Escravas, o segundo colocarase na avenida do Exército á altura do Parque Europa, un terceiro na estrada do Porto á altura da entrada das vías do tren, e o cuarto no Cantón Pequeno, paralelo aos xardíns.

Esta disposición supoñerá catro pasos por punto de avituallamento durante o percorrido, co quinto e último na meta, onde os corredores e as corredoras poderán recuperarse do esforzo con avituallamento sólido e líquido.

A situación exacta dos puntos de avituallamento e o contido de cada un deles será o seguinte:

• Km 5 - Oza: no PK 5´380 (auga)
• Km 10 - Avenida do Exercito á altura do Parque Europa: no PK 9´720 (auga)
• Km 15 - Estrada do Porto á altura da entrada das vías do tren ao porto: no PK 15´225 (auga)
• Km 20 - Cantón Pequeno, paralelo aos xardíns: no PK 19´690 (auga)
• META - (auga, Powerade, sólido)

Ademais, todos/as os/as atletas que o desexen poderán utilizar un avituallamento propio. Para iso deberán entregarllo á organización ata unha hora antes da saída, debidamente cerrado e marcado co seu número de dorsal e o punto quilométrico no que queren atopalo. O lugar de entrega será a zona habilitada para entrega de dorsais o día da carreira. Se o/a corredor/a desexa que se lle entregue na man, deberá designar e situar a unha persoa baixo a súa responsabilidade que cumprirá esta función. Esta deberá estar acreditada pola organización de Coruña 21. Calquera tipo de avituallamento fóra da zona marcada poderá supoñer a descualificación da proba para a persoa infractora.

Colectores: haberá os suficientes repartidos por todo o trazado para a recollida selectiva de residuos, e que serán de uso obrigatorio por parte de todas as persoas corredores/as. O obxectivo é que Coruña21 sexa un evento sostible e libre de residuos, e que favoreza que se produza o menor impacto ambiental na cidade. Se as persoas participantes non os empregan poderá derivar nunha descualificación.

Ademais, situaranse colectores aproximadamente 200 metros despois da saída para aqueles/as participantes que desexen depositar a súa máscara tras a saída, como permite o protocolo FISICOVID da Federación Galega de Atletismo.

Servizos W.C.: os/as atletas terán á súa disposición baños portátiles situados na saída e na meta, na zona do palco da música dos xardíns de Méndez Núñez. De igual maneira estarán dispoñibles nos puntos de avituallamento intermedios.

Duchas: establecerase un servizo de duchas nas instalacións da Cidade Deportiva de Riazor, ao que os/as atletas poderán acceder co seu dorsal, en horario de 10:30 a 13:30 horas.

Servizo de fisioterapia: estará dispoñible nunha carpa situada no Cantón Grande, na zona de meta.

Entrega de trofeos: realizarase no palco situado na zona do Obelisco, a partir das 12:00 h.

Diploma: unha vez que se publiquen os resultados de Coruña21, os corredores e as corredoras poderán acceder para descargar o seu diploma personalizado co seu nome e o tempo realizado na web www.carreirasgalegas.com.

En definitiva, Coruña21 ofreceralles ás súas máis de 1.400 participantes un amplo abano de servizos para que a súa experiencia nesta edición do medio maratón sexa inesquecible.