Hidratarse é fundamental no deporte e quen compita en Coruña42 o vindeiro domingo, 2 de outubro, poderán facelo cada 5.000 metros.

Haberá avituallamento nos quilómetros 5, 10, 15, 20, 25, 30, 35 e 40, que será o último, a 2 quilómetros para a liña de meta, aínda que, por cuestións loxísticas, algúns puntos desprazaranse uns metros.

Nos quilómetros acabados en 5, o avituallamento será líquido, con auga e bebidas isotónicas, que se servirán en vaso, mentres que nos acabados en cero, dispoñerase tamén de avituallamento sólido, con plátanos e laranxas.

Á chegada a meta, ademais deses dous tipos de avituallamento, Coruña42 ofrecerá aos finishers unha barriña enerxética, un bolo e froitos secos.

Sanbrandan, Coca-Cola, Vegalsa e El Corte Inglés, patrocinadores da carreira, colaboran no avituallamento.

Salvador de Madariaga, na contorna do mercado de Elviña, será o primeiro punto de avituallamento no quilómetro 4,95 e tamén, no outro sentido da proba, no ecuador da carreira (km. 21,27)

O segundo punto estará na estrada do Porto, no cruzamento do ferrocarril ao Peirao do Leste (quilómetros 8,75 e 26,37).

O terceiro situarase no paseo peonil da Dársena, nos quilómetros 14,40 e 31,90.

O cuarto atoparase en Manuel Murguía á altura de Almirante Cadarso, no quilómetro 35,40. Por ese punto pasará antes a 10K, mais, nesa localización, o avituallamento só estará operativo para a C42.

O quinto e último punto de avituallamento situarase na rúa Matadoiro, no cruzamento con Cantábrico, no quilómetro 40,57 do Maratón Atlántica. Compartirase coa paralela de 10 quilómetros (quilómetro 5,10).

Despois de cada avituallamento, as persoas participantes en Coruña42 e a proba menor, de 10.000 metros, dispoñerán de colectores para depositar os residuos.