O Servizo de Promoción Económica, Emprego, Comercio, Consumo e Turismo, adscrito á Tenencia de Alcaldía de Emprego e Empresa do Excmo. Concello da Coruña, organiza no Centro Municipal de Empresas do Igrexario da Grela un PROGRAMA DE CONSOLIDACIÓN DE EMPRENDEDORES, Afianza e fortalece a túa empresa, que ofrece unha oferta formativa baixo a fórmula de Pílulas de Coñecemento que analiza todos os contidos que resultan de interese, utilidade e practicidade para, tanto emprendedores e pequenas empresas que comezan a súa andaina, como para proxectos xa instaurados con necesidade de reformulación estratéxica do seu plan de negocio no medio dunha conxuntura económica desfavorable. Así, previuse a participación tanto das propias empresas e proxectos instaladas no Centro Municipal de Empresas, como a todos os emprendedores que foron asesorados e formados no Servizo de Promoción Económica e Emprego, abríndose tamén a posibilidade de participar a calquera outra persoa ou empresa interesada.