A primeira semana completa do mes de maio (do 5 ao 9 de maio), arrincou cunha nova quenda de visitas do programa Itinerarios 2024-25 , que busca darlle a coñecer a historia da Coruña e dos seus edificios emblemáticos ao alumnado dos CEIP e IES da cidade.

Os días 5 e 6 de maio, alumnos e alumnas do CEIP San Francisco Javier (6.º de EP) e do CEIP Anxo da Guarda (5.º e 6.º de EP) gozaron do itinerario "Prazas con poder", a través do cal coñeceron a importancia, ao longo da historia, das prazas como lugar de intercambios económicos ou de encontro veciñal. O percorrido permitiulles coñecer desde a praza de María Pita e o Concello ata prazas como a da Colexiata, Santo Domingo, Azcárraga ou a da Constitución.

Pola súa banda, os días 7 e 9 de maio, alumnado de 3.º de EP do CEIP Anxo da Guarda e de 4.º de EP do CEIP Sal Lence acudiu ao museo militar para coñecer como foi a batalla de Elviña e a figura de Sir John Moore para, a posteriori, saber algo máis da historia doutros personaxes da cidade como Isabel Zendal ou María Pita.

Pódense consultar os próximos itinerarios programados desde a seguinte ligazón: calendario de itinerarios programados.