O programa "Cinema na escola" persegue converter a cada alumno/a no/a verdadeiro/a protagonista da aprendizaxe, xa que cada participante é capaz de potenciar os seus talentos, traballar en equipo, desenvolver a súa creatividade, aprender, expresar emocións e contar historias.

Requisitos

• A elaboración da curtametraxe polo alumnado participante realizarase utilizando como ferramenta os teléfonos móbiles.
• As curtametraxes terán que ser en lingua galega e deben entregarse no mes de abril.
• Prohíbese especificamente o uso de IA xenerativa aplicada a vídeo e efectos visuais nas pezas participantes. O obxectivo desta medida non é rexeitar o avance tecnolóxico, senón protexer o carácter pedagóxico e artesanal do programa e priorizar aprendizaxes relacionadas coa planificación, a resolución creativa de problemas, os efectos prácticos, a posta en escena e a destreza audiovisual real. Con excepción da grafía dos títulos e créditos.

Organización do programa

O programa consta de:

• Obradoiros formativos "en liña" ou presenciais de iniciación á creación audiovisual; formación e asesoramento presenciais nas tarefas de filmación e montaxe, co obxecto de darlle ferramentas ao alumnado para poder elaborar unha curtametraxe.
• Realización do concurso: a presentación das curtametraxes farase nunha ou en dúas galas finais e nas que un xurado cualificado elixirá as curtas gañadoras nas distintas categorías.

Obradoiros formativos

Levarase a cabo unha formación específica para o profesorado para os efectos de que poidan traballar na aula a creación dunha curtametraxe sobre un tema libremente decidido polo alumnado; nela abordaranse aspectos relacionados coa creación e coa produción audiovisual.

1. A formación inicial en liña (ou presencial) desenvolverase a través dunha plataforma e constará dun mínimo de 2 sesións de 90 minutos cada unha, nun horario que se determinará cos centros participantes.
2. Unha vez rematada a fase de formación en liña, haberá unha segunda fase de formación individual presencial e de seguimento do proxecto, onde os equipos poderán comezar o traballo de guionización, gravación, edición e montaxe final das curtametraxes. A estimación do número de horas destinado a esta formación individualizada e presencial será de 5 horas por grupo.
3. Creación das curtametraxes. Unha vez finalizada a formación, os equipos participantes realizarán a redacción do guión, gravación, edición e montaxe final.

Ao longo deste proceso, a empresa organizadora deberá asignar unha persoa especialista na materia, que estará dispoñible para resolver calquera dúbida e axudar de maneira telemática os grupos participantes.

A empresa organizadora, en coordinación co SME, establecerá os períodos formativos, de acordo cos centros educativos participantes.

Entrega e valoración de curtametraxes

Unha vez materializado o produto final, as curtametraxes deberanse subir á plataforma Youtube, usando a conta Gmail do colexio ou creando unha específica para tal fin, no enderezo facilitado, e enviando a ligazón correspondente ao correo proporcionado pola empresa organizadora, ata o 30 de abril.

Para a valoración das curtametraxes presentadas, designarase un xurado composto por, cando menos, 3 membros especialistas na materia. Actuará como secretario/a un/unha técnico/a do Servizo Municipal de Educación, que redactará a acta do desenvolvemento e conclusións do veredicto. Poderá quedar deserto algún premio.

O xurado verá as curtametraxes presentadas para valoralas e proporá unha selección de catro proxectos finalistas como candidatos de cada un dos premios propostos, nas 2 categorías: primaria e secundaria. O xurado facilitará en sobres lacrados o nome da curtametraxe gañadora de cada un dos premios do concurso en ambas as categorías.

Premios

Os premios propostos por cada categoría serán os seguintes:

1. Mellor Curtametraxe
2. Mellor Interpretación
3. Mellor Guión
4. Mellor Fotografía
5. Mellores Efectos Visuais
6. Mellor Edición e Montaxe
7. Mellor Edición de Audio

Na etapa educativa de educación primaria, o valor pedagóxico do programa está moito máis relacionado co proceso vivido, a participación, o traballo en equipo, a creatividade ou a superación de dificultades que coa excelencia técnica final. Por este motivo, o Xurado poderá reformular parte dos premios técnicos e potenciar os máis vinculados aos valores educativos e humanos do proxecto, por exemplo: Curtametraxe máis Divertida, Premio ao Esforzo, Premio aos Valores, Premio á Creatividade, Premio ao Traballo en Equipo...

A proposta de premios poderá verse ampliada (por exemplo, 1.º e 2.º premios de cada categoría ou mencións especiais), en función do número de grupos participantes.

O premio para cada un dos grupos premiados consistirá en galardóns e figuras.

Premio do Público - votación popular

Para outorgar o Premio do Público (Mellor Curtametraxe por votación popular), poderanse ver as curtas presentadas na canle de YouTube de Educación do Concello da Coruña.

Para determinar as curtos gañadoras do Premio do Público, teranse en conta as estatísticas de reproducións, gústames e retencións (porcentaxe de tempo visto) durante a semana anterior ás galas.

Gala final

O Xurado proporá unha selección dos proxectos finalistas como candidatos a cada un dos premios propostos.

Os premios serán entregados nunha Gala final por cada categoría. As galas realizaranse no Centro Sociocultural Ágora, os días 19 (primaria) e 20 (ESO) de maio de 2027 (datas por confirmar). Nestas serán proxectados fragmentos das curtas finalistas, desvelados os grupos gañadores e entregados os premios correspondentes.

En ambas as galas, contaremos coa presenza do concelleiro de Educación, Formación e Innovación Tecnolóxica, Juan Ignacio Borrego Vázquez, que entregará varios premios.