Freestyle People School é un programa socioeducativo innovador que utiliza o freestyle rap, a improvisación e as artes urbanas como ferramentas para promover a convivencia positiva, a educación emocional, a inclusión e a prevención das diferentes formas de violencia entre iguais.

O programa está desenvolvido por Freestyle People, o primeiro grupo de freestyle inclusivo formado maioritariamente por mozos e mozas con discapacidade intelectual e outros mozos en situación de vulnerabilidade social, impulsado pola Asociación Poten100mos e Gallos del Norte.

A proposta pretende achegarlle aos centros educativos da Coruña unha metodoloxía próxima á mocidade, baseada na participación activa, na creación artística e na aprendizaxe entre iguais, abordando dúas das principais problemáticas detectadas actualmente nos centros educativos:

• O ciberacoso e a violencia dixital.
• A violencia de xénero e o acoso sexual entre adolescentes.

Programa

O programa divídese en 5 bloques:

1. Presentación.
2. Campaña "Rimando polo respecto dixital": prevención do ciberacoso e da violencia dixital.
3. Decálogo de boas relacións e convivencia positiva: prevención da violencia de xénero e educación emocional.
4. Freestyle, expresión artística e acción colectiva. Creación artística final por centro.
5. "A Coruña rima contra as violencias". Encontro municipal de convivencia, inclusión e participación infantil.

Cronograma

O programa comeza en novembro cunha sesión por mes. Ata o mes de maio irase realizando unha sesión mensual agás nos meses de febreiro e abril, que haberá dous.

No mes de xuño celebrarase o encontro "A Coruña rima contra as violencias".

Condicións do programa

• Poderán participar ata un máximo de 50 escolares por centro educativo.
• As sesións terán unha duración de 50 minutos.
• Os centros deben dispoñer dun espazo con capacidade suficiente para impartir as sesións.