"Co obxectivo de romper os estereotipos e de mostrar a ópera como unha proposta moito máis próxima do que en moitas ocasións está na mente do público, especialmente a idades temperás, nace fai xa catro anos o programa Ópera para nenas e nenos.

Máis de 1.000 escolares de cuarto, quinto e sexto de primaria de distintos centros da Coruña e comarca poderán gozar desta proposta que se enmarca na programación didáctica de Amigos da Ópera da Coruña desde unha perspectiva de achegarse á lírica como "unha arte por descubrir e á cultura en xeral como un medio para viaxar a través do tempo e o espazo".

O auditorio da Sede Afundación da Coruña acollerá o 20 e 21 de outubro unha proposta na que os estudantes se achegarán á ópera a través de fragmentos interpretados polo equipo de Ópera Kids. Durante unha hora, os participantes farán un percorrido a través da música, nunha actividade na que poderán participar sumando as súas voces.