Mediante a realización de debuxos e cartas, o alumnado poderá expresar as súas ideas, propostas e reflexións sobre a importancia de camiñar ao colexio de forma segura, favorecendo a creatividade, a expresión artística e escrita, a educación en valores e o desenvolvemento de actitudes responsables relacionadas coa convivencia, a autonomía e o respecto polo espazo público.

Como actividade previa, os grupos participantes recibirán un taller educativo e participativo sobre mobilidade segura e sustentable, que servirá de base para a elaboración dos traballos presentados ao concurso.

Cada centro educativo realizará unha preselección e remitirá a STOP Accidentes Galicia un máximo de 15 traballos (cartas e/ou debuxos), acompañados da relación do alumnado seleccionado e do título de cada obra.

O alumnado poderá participar en ambas as modalidades (carta e debuxo), aínda que unicamente un dos traballos poderá resultar finalista.

Premios

Premiaranse quince traballos entre as modalidades de debuxo e carta. Doce deles ilustrarán os meses do calendario anual de STOP Accidentes Galicia e os tres restantes corresponderán a premios especiais destinados á portada e ás páxinas de presentación do calendario.

O alumnado gañador recibirá un premio relacionado coa seguridade viaria e, entre todas as persoas participantes finalistas, sortearanse un agasallo.

A entrega de premios para o alumnado gañador terá lugar no Salón de Plenos do Concello da Coruña no mes de decembro de 2026.