O Departamento de Mocidade do Concello da Coruña, a través dos Espazos Municipais de Información Xuvenil, sitúan en centros públicos e concertados con ESO e bacharelato da cidade, unha rede de pequenas sucursais informativas durante o curso escolar.

Entre outros, participan neste programa de dinamización e difusión da información, IES, CIFP, a Escola Oficial de Idiomas, a Escola de Arte e Superior de Deseño Pablo Picasso e o Conservatorio Profesional de Música.

Estes pequenos puntos de información, coñecidos como Antenas de Información Xuvenil, conectan os Espazos de Información Xuvenil do concello coa mocidade, ao achegarse aos centros educativos a través dun programa de "difusión da información entre iguais".

Cada Antena de Información comprende:

• Un espazo físico no centro desde no que se difundirá información de interese xuvenil proporcionada semanalmente polos Espazos Municipais de Información Xuvenil do Concello da Coruña.
• Canles dixitais de interese xuvenil.
• E, o máis importante: unha persoa ou un grupo de persoas, as/os antenas.

Teño que presentar unha proposta?

Unha das ferramentas para valorar as solicitudes presentadas e ver como podería ser o primeiro enfoque de cada posible Antena é o proxecto que acompaña a solicitude.

Este tería que incluír os seguintes puntos:

1. Presentación de quen presenta (nome/s e curso, gustos e intereses, participación noutros proxectos do centro)
2. Expectativas e intereses respecto ao programa Antenas de Información Xuvenil
3. Ideas e propostas de como dinamizar a información no teu centro
4. A adecuación ao centro, a orixinalidade e viabilidade do proxecto

Compromisos das antenas de información xuvenil

• Asistir ás accións formativas e reunións de coordinación que se convoquen.
• Establecer un acordo de incorporación para o desenvolvemento deste programa.
• Estar en comunicación permanente cos Espazos de Información Xuvenil.
• Manter o espazo informativo e as canles dixitais de información actualizados semanalmente, de forma ordenada e atractiva.
• Difundir a información de interese xuvenil a través dos medios de comunicación ao seu alcance: redes sociais, compañeiras/os de instituto, delegadas/os de clase etc.
• Animar as/os compañeiras/os participar da información e achegar inquietudes, intereses, ideas ou opinións.
• Manter en bo estado o material ou ferramentas cedidas polo Concello ou a empresa adxudicataria.

Contraprestacións das antenas de información xuvenil

• Recibir formación en materia de información xuvenil: dinamización da información, xestión de redes sociais etc.
• Solicitar gratuitamente o carné internacional de estudante.
• Obter un certificado oficial que acredite a participación no programa.
• Recibir entradas a eventos organizados ou programados polo Concello (concertos, eventos deportivos, cinema, teatro...)
• Compensación económica de 100,00 euros brutos por colaboración educativa. Esta compensación realizarase unha vez que se complete o proxecto anual. A compensación económica é por proxecto de antena, polo que no caso de que existan 2 persoas no proxecto, a compensación sería de 50,00 € para cada unha delas.