O patio da EIM Arela encheuse esta mañá de confeti e música, pero tamén de sabedoría, valentía e referentes femininos. Baixo o lema "Mulleres que cambiaron o mundo", a escola celebrou un Entroido diferente, no que o xogo e a aprendizaxe se deron a man para lles render homenaxe a figuras que romperon barreiras.

O patio transformouse nunha gran biblioteca máxica na que, entre libros xigantes, cobraron vida os personaxes que cada aula traballou con agarimo durante as últimas semanas. A decoración non só foi estética; serviu de marco para que os/as máis pequenos/as comprendesen que a historia tamén se escribe con nomes de muller.

Os nenos e as nenas luciron con orgullo disfraces que representaban un abano incrible de talento e épocas:

• Ciencia e exploración: dende as batas de Marie Curie e as túnicas de Hipatia de Alexandría, ata os prismáticos de Jane Goodall
• Arte e literatura: o colorido universo de Yayoi Kusama, a forza de Frida Kahlo e a sensibilidade poética de nosa Rosalía de Castro
• Historia e valentía: o liderado de Cleopatra e o espírito indomable da nosa heroína María Pita 

O momento álxido da xornada chegou coa actuación dos pais e das nais, que se sumaron á festa cunha posta en escena moi divertida que reforzou a mensaxe de igualdade e admiración por estas pioneiras. Ver as familias participar activamente nesta temática subliña a importancia de educar en valores de forma conxunta.