As trinta alumnas e alumnos coruñeses que participan na nova edición das Bolsas Norteamérica xa viaxan rumbo ao Canadá, onde as rapazas e os rapaces beneficiarios desta última convocatoria cursarán o seu primeiro ano de bacharelato en centros educativos do país.

O percorrido cara ao outro lado do Atlántico arrincou na pasada madrugada, con saída desde o Coliseum en dirección ao aeroporto portugués de Sá Carneiro (Porto). Dende alí, as e os participantes no programa viaxarán en avión ao Canadá.

O concelleiro de Educación, Formación e Innovación Tecnolóxica, Juan Ignacio Borrego, desexoulle moita sorte ao alumnado que participa nesta edición das Bolsas Norteamérica, unha iniciativa impulsada polo Concello dende hai máis de vinte anos e que, no seu momento, supuxo unha medida pioneira a escala municipal, favorecendo que a mocidade coruñesa curse estudos no estranxeiro, adquira un dominio avanzado da lingua inglesa e, de paso, coñeza e viva polo miúdo a cultura e sociedade do país de acollida.

"É unha ocasión inmellorable para se desenvolver e evolucionar, tanto no referente á formación académica como en termos persoais", destacou Borrego, que lembrou que o Concello estará ao dispor das familias e do alumnado participante ao longo da súa estadía no Canadá, para atender as súas necesidades ou solucionar calquera incidencia.