A alcaldesa, Inés Rey, participou esta mañá na edición número XXV do Correlingua, que se celebrou na Coruña coa participación de 2.200 alumnos e alumnas de diferentes centros educativos da cidade e a súa contorna. As persoas participantes realizaron un percorrido a pé desde o Palacio dos Deportes ata a Torre de Hércules con pancartas e proclamas a prol do uso da lingua galega.

"Ver os centros de toda a contorna aquí reunidos: A Coruña, Oleiros, Arteixo, Cambre, Pontedeume... é unha proba clara de que hai unha xeración que non lle dá as costas ao galego. Ao contrario: facedes moitísimas iniciativas ao longo do ano para que o galego sexa parte activa da vosa vida", sinalou a alcaldesa, que reivindicou a necesidade de que o galego "se expanda máis alá das aulas". O acto estivo presentado pola actriz Isabel Risco e contou coa actuación musical de Pauliña. O alumnado do IES Breamo de Pontedeume, gañadores/as do concurso de lemas deste ano, foi o encargado de ler o manifesto.

A alcaldesa fixo entrega dos premios ao CEIP Juana de Vega de Oleiros por ser o centro máis animado e ao IES Agra do Orzán pola mellor pancarta. Consistiu nun lote de libros para cada centro doados polas Bibliotecas Municipais da Coruña.

Este ano o Correlingua celebrou a súa edición número 25 baixo o lema 'A mocidade activa por unha lingua viva'. Esta iniciativa educativa que conta co apoio do Concello da Coruña e durante todo o ano conta con diferentes actividades co obxectivo de que a mocidade galega empregue a lingua.

Centros participantes

• A Coruña: IES Agra do Orzán - IES Monelos - IES Fernando Wirtz - CEIP San Francisco Xabier - IES P Eusebio da Guarda - IES Menéndez Pidal - CEE María Mariño - CEIP Torre de Hércules- CEIP de Zalaeta - C.E.I.P. Sagrada Familia - IESP Neira Vilas.
• A Laracha: IES Agra de Leborís
• Arteixo: CEIP Ponte dos Brozos
• Cabana de Bergantiños: CPI As Revoltas
• Camariñas: CEIP Plurilingüe Ponte do Porto
• Cambre: IES Alfonso X O sabio, IES David Buján
• Carral: IES de Carral
• Cerceda: CPI Plurilingüe O Cruce
• Culleredo: CIFP Universidade Laboral
• Oleiros: CEIP Juana de Vega
• Ponteceso: IES Eduardo Pondal
• Pontedeume: IES Breamo