Desde o pasado martes día 9 de decembro e ata o próximo 18 de decembro, o programa educativo Idiomas en el centro 2025-26 está a levar a cabo o seu proxecto final a través de dúas propostas educativas: "Storytelling" (para o alumnado de Educación Infantil) e "Skill contest" (para o alumnado de Educación Primaria).

"Storytelling" trátase dunha proposta didáctica de animación á lectura en inglés. Está baseada na dramatización e narración dun conto, xunto cunha sesión lúdico-didáctica en inglés relacionada coa proposta de animación lectora escollida. En total, realizaranse 7 sesións.

Pola súa banda, "Skill contest" é un proxecto didáctico baseado na realización dun concurso de habilidades lingüísticas en inglés. Realizaranse 11 sesións en total.

En total, participarán 275 escolares de 18 grupos dos centros CEIP Concepción Arenal, Juan Fernández Latorre, Labaca, María Pita, Raquel Camacho, Sacra Familia, Sal Lence, San Pedro de Visma, Ramón da Sagra e Víctor López Seoane.

O programa Idiomas no centro, desenvolvido pola Federación Provincial de Anpas de Centros Públicos da Coruña en convenio co Concello da Coruña, trátase dunha proposta de lecer complementaria, en tempo extraescolar, para a promoción da aprendizaxe de idiomas estranxeiros (inglés ou francés) nun ambiente lúdico e participativo.