O alumnado de 5 anos (6.º de EI) do CEIP Anxo da Garda e do CEIP Sal Lence participou hoxe, venres 25 de abril, nas últimas rutas escolares do programa Rutas urbanas animadas 2024-25 , organizado polo Servizo Municipal de Educación e a Federación das ANPA de centros públicos.

Nesta ocasión, os nenos e nenas participaron na actividade "Un museo ao aire libre", que se desenvolve polos xardíns de Méndez Núñez, máis concretamente na zona do "recheo", onde se coñecen os elementos que se atopan nel, mediante unha metodoloxía de observación e exploración do medio urbano, utilizando o xogo como ferramenta para a adquisición de comportamentos cívicos.

Nesta edición, que arrincou o pasado 7 de marzo, participaron un total de 3.195 escolares de 25 centros educativos, distribuídos en 154 grupos. Os lugares visitados foron, ademais dos Xardíns de Méndez Núñez, a praza de María Pita e o parque de Santa Margarida.