A mobilidade ten sen dúbida un valor positivo, pero tamén ten unha carga negativa: os accidentes de tráfico e a contaminación; esta última provoca máis de 16.000 mortes prematuras ao ano. As Policías Locais estamos especialmente sensibilizadas con estes problemas e levamos máis de 30 anos dedicando esforzos a educar a escolares de diferentes idades, cunha visión da Educación Viaria integral, inicial e permanente.

Coa intención de que A Coruña se converta nunha cidade máis amable co medio, máis segura e máis saudable, ofertamos esta actividade en bicicleta que ten ademais o obxectivo de mesturar a educación viaria e os contidos escolares.

Actividades

As actividades están organizadas en 2 sesións:

1.ª sesión: As estacións da bicicleta.

No ximnasio do centro organízanse tres talleres polos que vai rotando o alumnado.

• Estación de seguridade viaria: charla impartida por ciclistas da Policía Local
• Estación de ergonomía: impartido por Escola da Bici
• Estación de mecánica: impartido por persoal técnico de BiciCoruña

2.ª sesión: Saídas en bicicleta

As saídas en bicicleta teñen como obxectivo dar a coñecer lugares emblemáticos da cidade e compartir anacos da historia da nosa cidade mentres visitamos puntos de interese escolar como o Castelo de San Antón, o Paseo Marítimo, o Dique de Abrigo, a Escola de Belas Artes ou o Parque Escultórico da Torre de Hércules, entre outros.