O proxecto estrutúrase nunha actividade teórica principal e varias actividades prácticas complementarias e opcionais, que permiten reforzar os contidos a través da experiencia directa, a reflexión e a participación activa do alumnado.

• Actividade teórica: taller de mobilidade sustentable e segura.
  • Duración: 50 minutos
  • Realízase unha sesión de sensibilización na aula apoiada en contidos multimedia e dinámicas participativas. O obxectivo é promover a aprendizaxe significativa ao redor dunha mobilidade responsable, segura e sustentable. Trabállase desde unha perspectiva educativa e vivencial, fomentando a reflexión e o pensamento crítico.
• Actividades prácticas complementarias (opcionais) (estas actividades teñen carácter vivencial e reforzan as aprendizaxes adquiridas na fase teórica):
  • Duración: mínima dunha clase de 50 minutos e máximo de dúas clases no caso do simulacro.
  • Taller de comunicación asertiva; aprender a dicir NON: dicir "NON" ante situacións de presión ou risco non é unha capacidade innata, senón unha habilidade que se aprende e adestra. Con este taller, contribúese ao desenvolvemento das habilidades sociais do alumnado e ten como obxectivo dotalos de ferramentas prácticas para afrontar, de forma firme e respectuosa, situacións que poidan comprometer a súa seguridade na mobilidade. A través de dinámicas participativas, trabállanse técnicas de comunicación asertiva que fortalecen o autocontrol, a autoestima e a toma de decisións conscientes, promovendo así unha actitude preventiva e responsable ante a condución e a mobilidade cotiá
  • Detectives da mobilidade: este taller propón unha actividade práctica de observación e análise da contorna do centro educativo para identificar riscos, puntos críticos e barreiras na mobilidade cotiá. O alumnado traballa de maneira colaborativa para detectar comportamentos inseguros e dificultades estruturais, desenvolvendo así unha conciencia crítica e responsable. Como resultado, foméntase a capacidade de propoñer solucións e melloras que contribúan a unha mobilidade máis segura e sustentable.
  • Simulacro de sinistro viario: en colaboración cos servizos de emerxencias (Bombeiros, Policía Local, servizos sanitarios), realízase un simulacro de sinistro de tráfico. Esta actividade ten un forte compoñente emocional e vivencial, que busca impactar no alumnado e sensibilizar sobre as consecuencias da imprudencia ou o descoido ao volante. Tras o simulacro, ábrese un espazo de diálogo onde os participantes reflexionan en grupo, e cóntase co testemuño directo dunha vítima real. Esta experiencia favorece a interiorización de valores preventivos e a adopción de condutas responsables.