Unha actriz que realizou a súa carreira en Francia, que representaba a vontade, a independencia e a forza creativa tanto na súa vida pública como actriz de teatro e cine como na súa vida persoal. Foi compendio de potencia ética e de compromiso coa II República Española no sentido máis alto da palabra, María Casares sempre dicía que o seu primeiro e mais doloroso exilio foi ter que abandonar A Coruña con oito anos para instalarse en Madrid; o segundo, o definitivo, levaríaa posteriormente a Francia.

Cadernos Didácticos

Este material didáctico foi elaborado con motivo do centenario do nacemento da actriz María Casares, conmemoración que consideramos unha grande oportunidade para lembrar a súa figura e achegala ao alumnado de forma atractiva e didáctica. O feito de ser unha actriz de orixe galega pero cunha traxectoria artística en Francia, unido á súa condición de exiliada, fixo que se considerase practicamente unha estranxeira e, por conseguinte, que fose esquecida inxustamente tras a súa morte, a diferenza do que aconteceu en Francia, onde aínda hoxe é homenaxeada. Queremos reivindicar con este traballo a súa figura, senlleira e de especial relevancia para comprender o noso pasado, pero tamén o noso presente, outorgándolle o seu merecido espazo na memoria colectiva.

As actividades que presentamos, orientadas ao alumnado de Educación Primaria e Secundaria, non pretenden ser unha proposta didáctica pechada, pois coidamos que, para a súa maior eficacia, deben ser adaptadas aos intereses e coñecementos do alumnado e do profesorado, así como á súa diversidade, mediante a selección, modificación e afondamento naquelas cuestións que os e as docentes xulguen oportunas.