O evento central desenvolverase na praza de María Pita, que se pechará ao tráfico, e será o epicentro da celebración.

A praza transformarase de maneira temporal para acoller unha xornada lúdica como un gran escenario de xogo para o alumnado de 2 a 3 anos das escolas da Rede de Escolas Infantís Municipais (REIM). Desenvolveranse xogos e talleres deseñados especialmente para esta etapa educativa; a praza estará organizada en varias estacións temáticas, que contarán con persoal especializado para garantir unha experiencia segura e enriquecedora.

O alumnado estará en todo momento acompañado dos seus docentes, que respectarán as indicacións do persoal organizador.

O Servizo de Educación dispoñerá un servizo de autobuses gratuíto para as escolas para os seus desprazamentos á praza de María Pita .

A iniciativa está enmarcada na campaña global "Hora de Xogar", promovida pola Asociación Internacional de Cidades Educadoras, que ten como obxectivo poñer en valor o xogo como un dereito fundamental da infancia. A Coruña participará así nunha acción internacional que implicará a milleiros de nenos en máis de 50 cidades do mundo.