- Inicio
- Programas Educativos
- Detalle programa
Fomento da lingua galega nas Escolas Infantís Municipais 2022
Programa de fomento e dinamización do galego na Rede de Escolas Infantís Municipais do Concello da Coruña, organizado polo Servizo de Normalización Lingüística
Localización do centro:
Só da Coruña
Servizo municipal:
Normalización Lingüística
Tipo de actividade:
Complementaria
Titularidade do centro:
Público
A quen vai dirixido?:
Alumnado da REIM
Obxecto:
Os obxectivos deste programa, baseados no Plan xeral de normalización da lingua galega, son:
- Contribuír na galeguización de todos os niveis do sistema educativo e na dotación de materiais e recursos ás escolas infantís municipais, principalmente lúdicos, que poidan axudar na consecución desta galeguización.
- Axudar a que as familias que teñen o galego como lingua habitual e desexan que as súas fillas e fillos non o perdan ao socializaren, sobre todo coa entrada na escola, poidan lograr o seu obxectivo.
- Contribuír a que o sistema educativo dispoña dunha planificación orientada a garantir unha competencia semellante nas dúas linguas oficiais, sobre todo nun contexto tan castelanizado como A Coruña.
- Ofrecerlles ás EIM máis recursos e materiais para o desenvolvemento das aulas en galego na etapa educativa 0-3 anos, principalmente lúdicos e didácticos e que fomenten unha imaxe positiva do galego no alumnado.
Co fin de conseguir estes fins propoñemos realizar:
- 12 pases escolares do espectáculo "Derriba da lúa", de Rilo e Penadique, dirixidos ao alumnado de 0 a 3 anos das Escolas Infantís Municipais do Concello da Coruña
- 12 pases escolares do espectáculo "Cantacontos para bebés", de Pablo Díaz, dirixidos ao alumnado de 0 a 3 anos das Escolas Infantís Municipais do Concello da Coruña
- 10 pases do espectáculo "Herba pequerrechiña", de Félix Arias, dirixidos ao alumnado de 0 a 3 anos de dez Escolas Infantís Municipais do Concello da Coruña
Os espectáculos realizaranse nas propias EIM, entre febreiro e novembro de 2022. De cada actividade levará a cabo un pase por escola. Naquelas tres EIM que contan cun maior número de alumnado (Arela, Vos Rosales e Carricanta) levarán a cabo dous pases do espectáculo no canto dun.
- 12 pases escolares do espectáculo "Derriba da lúa", de Rilo e Penadique, dirixidos ao alumnado de 0 a 3 anos das Escolas Infantís Municipais do Concello da Coruña
"Derriba da lúa" é un espectáculo da compañía Rilo e Penadique, formada pola narradora oral Vero Rilo e a música de acordeóns Sonsoles Penadique. Este espectáculo conxuga a narración oral con contos e a música en directo de acordeón. A Lúa, o Sol, a Terra, un carballo, o niño dun paxaro... Cantar, contar, aprender e xogar para crecer libres.
- 12 pases escolares do espectáculo "Cantacontos para bebés", de Pablo Díaz, dirixidos ao alumnado de 0 a 3 anos das Escolas Infantís Municipais do Concello da Coruña.
O premiado músico coruñés dirixe os seus espectáculos ao público infantil e concretamente esta actividade adáptaa para os e as máis peques. Unha viaxe a través dos contos que ten a música como fío condutor. Temas e rutinas da primeira idade que se mesturan coas letras dos libros que conta en directo e a música que toca de frauta, guitarra ou harmónica, tamén en directo.
- 10 pases do espectáculo "Herba pequerrechiña", de Félix Arias, dirixidos ao alumnado de 0 a 3 anos das Escolas Infantís Municipais do Concello da Coruña.
Félix Arias é profesor de música desde 2012 na EIM Monte Alto e desde 2015 na EIM Carmen Cervigón, ademais de en outros centros. Creou este espectáculo adaptando textos de escritores como Carlos Casares, Manuel María, María Victoria Moreno ou Xela Arias, cos que traballa a lingua galega a través da música en directo e dos instrumentos para interrelacionarse dunha maneira didáctica coas nenas e nenos. Realizará esta actividade nas outras dez escolas.
Inscricións:
Inscrición a través de inscricionslingua@coruna.es
Máis información:
En https://www.coruna.gal/lingua/gl/novas e inscrición a través de inscricionslingua@coruna.es
Síguenos en
Tes un navegador demasiado antigo!
Sentímolo pero o teu navegador é moi antigo para poder mostrar esta páxina. Debes de actualizalo ou usar un navegador compatible. Optimizamos esta web para Google Chrome, Mozilla Firefox, Opera, Safari e Microsoft Edge. Instalar agora un navegador compatible