O programa "Idiomas do Mundo" oferta un mínimo de 29 prazas para estancias dun mes en Irlanda durante os meses de xullo e/ou agosto, destinadas a estudantes que cursen 1º de Bacharelato durante o presente curso escolar.

O programa promove que o alumnado participe nunha acción intercultural, aumentando a conciencia e comprensión doutras culturas e países e a educación das persoas participantes respecto da diversidade e á igualdade, ao mesmo tempo que lles permita avanzar no seu desenvolvemento persoal.

As condicións do programa recolleranse nas bases reguladoras do mesmo, que se publicarán nesta mesma páxina en canto estean dispoñibles.

REQUISITOS

Poderá ser adxudicatario da bolsa o alumnado matriculado nun centro educativo do Concello da Coruña que cumpra os seguintes requisitos:

• Estar en posesión do documento nacional de identidade ou número de identidade de estranxeiro.
• Residir e estar empadroado co seu pai, nai ou representante legal, no seu caso, cun tempo previo de empadroamento mínimo dun ano ininterrompido inmediatamente anterior á publicación do extracto desta convocatoria no Boletín Oficial da Provincia (BOP).
• Estar matriculado e cursar 1º de Bacharelato nun centro escolar da cidade da Coruña no curso 2025-2026.
• Contar no curso de 4º da ESO cunha cualificación media de 6 ou máis e non ter ningunha materia suspensa.
• Contar en curso de 4º da ESO con cualificación de 7 ou máis na materia de inglés.
• Non estar inmerso nas prohibicións recollidas na Lei 9/2007, de 13 de xuño, de subvencións de Galicia. Este requisito, que inclúe non ter débedas co Concello da Coruña, será comprobado só no caso de resultar seleccionado, podendo dar lugar a que un solicitante inicialmente admitido pase a estar excluído por non cumprir este requisito na data de finalización do prazo de presentación de solicitudes.

BOLSA

A participación no programa non implica a total gratuidade para o alumnado beneficiario, polo que as familias, en función da súa renda per cápita, achegarán as cantidades que lles correspondan segundo as contías e porcentaxes sinalados na táboa recollida nas bases do programa, establecéndose dous tipos de bolsa:

• Bolsa total: serán beneficiarias de bolsa total as persoas seleccionadas que obteñan unha puntuación, en relación á situación económica da unidade familiar nuclear, comprendida entre 7 e 10 puntos (ambos inclusive).
• Bolsa parcial: o Concello asumirá un máximo do 65% e un mínimo do 5% do custo total das prazas do alumnado seleccionado que obteña unha puntuación, en relación á situación económica da unidade familiar nuclear, comprendida entre 0 e 6 puntos. As familias do alumnado beneficiario de bolsa parcial asumirán un mínimo do 5% e un máximo do 35% do prezo da praza.

PUBLICACIÓN DE LISTAS DEFINITIVAS E REUNIÓN INFORMATIVA

O Servizo de Educación do Concello da Coruña publicou, o mércores 20 de maio, as listas definitivas do alumnado seleccionado, en lista de espera e persoas excluídas. As listas pódense consultar a través do taboleiro de edictos municipal e nesta mesma páxina, na sección de documentos "relacionados".

De acordo ao estblecido no punto 13 das base da convocatoria, tras a publicación das listas definitivas, as persoas seleccionadas dispoñerán dun prazo de 10 días hábiles para a súa aceptación (do 21 de maio ao 3 de xuño, ambos os días incluídos), que deberá ser asinada por ambos os proxenitores ou titores legais e comunicada por escrito ao servizo municipal de educación (SME), a través dos rexistros municipais ou en calquera das dependencias ás que se refire o artigo 16 da Lei 39/2015, do 1 de outubro, do Procedemento Administrativo Común das Administracións Públicas. Transcorrido ese prazo de 10 días hábiles, sen que se produza tal comunicación, entenderase que renuncia á súa participación no programa.

Os modelos de aceptación e renuncia pódense descargar desde a sección de documentos "relacionados".

Por outra banda, no caso de que a persoa solicitante teña que facer unha achega económica, deberase achegar, así mesmo, o xustificante bancario do pago á empresa adxudicataria do importe correspondente á achega familiar.

Para informar sobre os detalles do programa convócase ás familias das persoas seleccionadas, e das 10 primeiras en lista de espera (número de orde de 33 a 42), a unha reunión informativa, que se celebrará o xoves 28 de maio, a partir das 18:00 horas, na aula 9 do Centro Sociocultural Ágora.