A iniciativa está enmarcada na Convención de Dereitos do neno (CDN) e o tratado internacional de nacións unidas, ratificado o 20 de novembro, no que se recoñece por primeira vez que os nenos/as son persoas con dereitos de pleno desenvolvemento físico, mental e social e con dereito a expresar libremente as súas opinións.

O artigo 12 da CDN fai referencia á necesidade de ofrecerlle aos nenos/as a oportunidade de ser escoitados en todos os procedementos sociais que lles afecten. O artigo 13 alude ao dereito á liberdade de expresión de nenos/as.

No marco dos dous artigos mencionados anteriormente, o Concello da Coruña ofrécelle aos centros escolares da cidade a oportunidade de participar na celebración dun pleno infantil presidido pola Alcaldesa da cidade.

Cada centro participante traballa ao redor dun dereito dos recollidos na CND, co material didáctico achegado por UNICEF, e require que o profesorado realice unha sesión preparatoria da actividade, de hora e media aproximadamente, no centro educativo.

O evento central, o Pleno infantil, terá lugar a última semana de novembro (data por determinar) no Salón de plenos do Concello da Coruña. Estará presidido pola alcaldesa da cidade, Inés Rey e asistirá o concelleiro de Educación, Juan Ignacio Borrego.

O pleno transformarase, de maneira temporal, nun espazo de participación infantil para conmemorar o Día da Infancia.