Condicións do programa/taller

Temáticas e formatos ou técnicas de traballo

1. Relación de temáticas que poden abordarse no taller*:

• Modelos de masculinidade e feminidade.
• As diferentes sexualidades e as Lgtbqi+fobias.
• Redes sociais e ciberviolencias de xénero.
• Profesións e actividades sen xénero.
• Consumo e publicidade con perspectiva de xénero.
• Identidades de xénero e orientación sexo afectiva.
• A imaxe persoal. Imposición de canons estéticos. A cousificación e a hipersexualización das nenas e mozas.
• Prevención da violencia sexual. Evitando a violencia sexual a través de relacións afectivo emocionais e sexuais sas.
• Abordaxe da xestión emocional e a súa relación coa saúde mental, aplicando a perspectiva de xénero.
• Abordaxe da diversidade (sexual, funcional, étnica, racial, cultural, imaxe física, identidade e orientación sexo-afectiva) e a súa relación co benestar físico e emocional, aplicando a perspectiva de xénero.

*As temáticas propostas poderán variar ao longo da duración do contrato para adaptarse ás novas realidades e necesidades detectadas polos centros educativos.

2. Relación de formatos para o desenvolvemento da sesión*:

• Cómic - Ilustración.
• Publicidade - Márketing.
• Música.
• Curtas - Vídeos - Podcast.

*Todos os formatos abordaranse con perspectiva de xénero.

Duración

Cada taller terá unha duración de 2 horas, recomendándose a súa distribución en varias xornadas consecutivas, axustando en calquera caso a súa distribución á dispoñibilidade do centro educativo.

Metodoloxía

Participativa (individual e a través de dinámicas grupales), a través de actividades que fomenten a capacidade creativa do alumnado.

Os contidos e materiais didácticos empregados estarán axustados ao nivel educativo e curso do alumnado participante.

As actividades realizadas para o desenvolvemento do taller respectarán o formato ou técnica seleccionada polo centro educativo. Estes formatos implican a realización de actividades novas, actualizadas e facendo uso das tecnoloxías da información e comunicación.

O desenvolvemento do taller abordará de maneira transversal o fomento de habilidades de comunicación e empatía entre o grupo de iguais.

Procedemento de actuación

• O centro educativo seleccionará a temática que considere máis idónea consonte á súa realidade e necesidades detectadas.
• O centro educativo seleccionará o formato ou técnica que considere máis adecuada coa que levar a cabo de maneira práctica e creativa os contidos que desenvolvan a temática seleccionada.
• Cada centro poderá seleccionar un máximo de dous talleres, seleccionando o nivel educativo e curso que considere máis adecuado dos que se relacionan no apartado de "A quen vai dirixido?".