Descrición da actividade

O programa Visita o teu mercado ofrece ao alumnado de primeiro e segundo ciclo de Educación Primaria dos centros escolares da Coruña a posibilidade de visitar os Mercados Municipais do concello (Praza de Lugo, San Agustín e Elviña) para coñecer o seu funcionamento e poñer en valor, a través de diferentes actividades lúdicas e un taller didáctico, a importancia da alimentación no ámbito educativo, xerando hábitos de vida saudables a través da alimentación.

Cada sesión ten unha duración de dúas horas (máis o desprazamento ao mercado) e componse dunha visita ao mercado, un taller didáctico e a degustación dun aperitivo.

Desenvolvemento da actividade

No mercado os grupos serán recibidos polos responsables do programa.

Previo recibimento entregarase material de apoio a cada escolar e ao profesorado que lles acompañe (obrigatorio dous profesores/as por grupo mínimo) para que poidan ir seguindo a visita. A continuación, realizarase unha visita guiada por todos os pavillóns. En cada pavillón (peixe, froita-verdura, carnes, pan e outros) faranse diferentes actividades prácticas e de dinamización.

Á finalización da visita realizarase un taller de alimentación saudable e comercio de proximidade e, para terminar, as persoas participantes gozarán dun aperitivo degustación e recibirán un pequeno obsequio.

Propoñerase aos colexios a realización dun traballo final en equipo (un por centro escolar) a realizar na aula, no que poñan en valor os coñecementos adquiridos e as pautas para seguir para unha alimentación saudable.