O programa de visitas escolares aglutina un amplo número de entidades da cidade e da súa contorna que ofertan a visita das súas instalacións polos centros educativos. Cada entidade indica as condicións das visitas no que se refire aos espazos para visitar, as persoas destinatarias, a xestión dos grupos e os horarios.

Descrición do programa

• Os centros non teñen que aboar entradas para acceder ás visitas.
• Cada centro poderá solicitar unha única visita ou itinerario por grupo-clase.
• Non se poderá solicitar a mesma visita ou percorrido para máis dun nivel por centro. Valoraranse as excepcións motivadas.
• O Servizo Municipal de Educación (SME en diante) asigna as visitas (ver proceso de asignación) baseándose nas condicións que indica a empresa e tendo en conta as preferencias dos centros, sempre que sexa posible.
• Unha vez que os centros teñen asignadas as datas definitivas débense poñer en contacto coa entidade (como máis tardar nas 48 horas anteriores a que se realice a actividade) para confirmar a visita e aclarar e/ou acordar calquera cuestión de interese.
• A aplicación coa que xestionamos o programa envía aos centros un recordatorio das visitas que están previstas para os próximos días, así como unha ficha de avaliación para cada un das actividades.
• O programa realízase do 13 de xaneiro ao 13 de xuño de 2025.

• Importante: no caso de que o centro e a entidade acorden un cambio da data asignada como definitiva polo SME, teñen a obriga de notificarllo ao departamento municipal para poder xestionar o devandito cambio coa empresa de transporte. De non facelo, poden non cumprirse as condicións establecidas no programa, tales como dispoñer de transporte gratuíto para ese día.

Proceso de asignación das visitas

• O prazo de solicitude das visitas ábrese desde o 16 de setembro ao 16 de outubro. Os centros teñen que solicitalas a través da ficha de inscrición (ver apartado de inscrición de centros).
• O SME adxudica provisionalmente as visitas e o 15 de novembro envía a través da aplicación do programa, tanto á dirección do centro como á da persoa rexistrada como coordinadora, un correo coas datas asignadas.
• Os centros teñen ata o 22 de novembro para comunicar calquera desconformidade coas datas asignadas. En caso de non facelo, as datas provisionais enténdese que son adecuadas e pasarán a definitivas.
• O SME asignará, na medida do posible, novas datas para as solicitudes que indicaron problemas coa data de adxudicación provisional. Unha vez confirmadas as novas datas coa entidade e o centro, estas pasarán a definitivas.
• O 5 de decembro enviarémoslles a todos os centros un correo coas asignacións definitivas de datas para as visitas solicitadas. Este documento será o de referencia para as entidades, os centros e o SME ao longo do programa. Os centros deben comprobar que recibiron o correo e estaren atentos ao calendario.

• Nota: o programa ten establecido un número máximo de visitas e itinerarios. No caso de que a demanda fose maior que a oferta adxudicarase por rigorosa orde de inscrición.

Servizo de transporte

• O SME facilita o transporte para realizar as visitas asignadas ás Escolas infantís Municipais, os CEIP e os IES da cidade.
• O bus estará dispoñible media hora antes do inicio de cada visita. Este horario poderase axustar en función da distancia do centro ao lugar de inicio da visita.
• Os autobuses teñen 54 prazas, polo que en ningún caso se pode exceder este número de participantes (incluído o profesorado acompañante). En caso de levar cadeiras de rodas, o total de prazas verase reducido.
• Os centros que necesiten transporte adaptado deben solicitalo previamente, para iso na aplicación hai habilitado un apartado específico.

Visitas e percorridos que se ofertan

A relación de visitas que se ofertan no programa son as que se enumeran a continuación. A descrición das características de cada unha delas están recollidas no arquivo que se inclúe no apartado de documentos relacionados.

1. Alimentos, visita o teu Gadis
2. Arquivo do Reino de Galicia
3. Biblioteca pública Miguel González Garcés
4. Bombeiros
5. Bonilla, a alimentación
6. Castro de Elviña: percorrendo o Castro
7. Cidade Vella
8. Coca Cola
9. Coñece o bus urbano da túa cidade
10. Cruz Vermella
11. El Ideal Gallego - DXT Campeón
12. ETAP - A Telva
13. Fabricación de Eléctrodos de Grafito: Resonac
14. Fundación Luís Seoane
15. Gadisa: oficina de central loxística
16. Industria de capintería de aluminio: Aluman
17. Instalacións de La Voz de Galicia
18. Instituto de Estudos Locais Jose Cornide Saavedra
19. Museo Arqueolóxico e Histórico Castelo de San Antón
20. Museo de Arte Sacra
21. Museo de Belas Artes
22. Museo de Telecomunicacións
23. Museo Histórico e Militar da Coruña
24. Policía Nacional. Corpo Nacional de Policía e Museo
25. Porto da Coruña
26. Rede Municipal de Información Xuvenil: formación profesional ou universitaria
27. Rede Municipal de Información Xuvenil. A rede visita o teu centro
28. Rede Municipal de Información Xuvenil. Recursos de mobilidade para a mocidade
29. Rede Municipal de Información Xuvenil. Visita ao espazo xuvenil Naves do Metrosidero
30. Torre de Hércules
31. Un día en Capitanía

Nota: as condicións de cada visita, establecidas polas entidades colaboradoras, poden sufrir modificacións ao longo do programa.