Trátase dunha estratexia global definida e financiada polo Concello da Coruña, que conta nunha parte concreta -Plan de Implementación- co cofinanciamento dos fondos europeos FEDER.

A concesión dos fondos FEDER ao Concello da Coruña resolveuse de forma definitiva mediante a Resolución do 21 de xullo de 2017, da Secretaría de Estado de Orzamentos e Gastos, publicada no BOE do 25 de xullo de 2017.

Ofrécese a Estratexia EidusCoruña desagregada por capítulos para facilitar a súa lectura:

1. Problemas e retos
2. Análise da área urbana
3. Diagnóstico
4. Ámbito de actuación
5. Plan de Implementación
6. Participación Ciudadana
7. Estructura administrativa
8. Principios transversales

Cal é o valor e eixo prioritario da Estratexia EidusCoruña?

A Estratexia EidusCoruña xira arredor da reconstrución da proximidade como valor urbano para o reforzo da convivencia no espazo público.

Para iso incorpora os principais obxectivos de mobilidade sustentable:

• Redución da dependencia do automóbil privado.
• Incremento de medios de transporte alternativos de menor impacto ambiental.
• Limitación de espazos en superficies dependentes de coches, con aparcadoiros disuasorios.
• Mellora da conexión e coordinación da rede de transporte público coa área metropolitana.
• Incorporación da intermodalidade, mediante a implantación de intercambiadores urbanos que permitan a boa articulación dun sistema de mobilidade sustentable.

Que dimensións definen a Estratexia EidusCoruña?

A estratexia organízase en función das 3 dimensións estratéxicas de Europa 2020, co obxectivo último de construír unha Coruña sustentable, intelixente e integradora.

Que comprende a globalidade da Estratexia EidusCoruña?

Esta estratexia global establece:

• un total de 11 Obxectivos Estratéxicos (OES) que dan resposta aos retos inicialmente expostos,
• que á súa vez se materializan en 23 Obxectivos Operativos (OP), mediante os que se concretan de forma máis detallada os resultados para alcanzar.
• o último e máis específico elo constitúeno as 34 liñas de actuación (LA) que achegan o maior nivel de concreción de EidusCoruña.

Como se desenvolve a estratexia?

A Estratexia EidusCoruña ponse en marcha a través de:

• un plan de implementación, que é a ferramenta que conta co cofinanciamento FEDER nun 80% para executar 22 liñas de actuación da estratexia.
• un plan complementario que achega o Concello da Coruña para 12 liñas de actuación.

A suma de ambos os plans conforman a globalidade da Estratexia EidusCoruña.

Que nivel de investimento abarcará a Estratexia EidusCoruña?

EidusCoruña implicará un investimento global de 52.100.000 € para o período 2017-2023.

Esta dotación financeira estrutúrase entre o Plan de Implementación, que abarcará 22 liñas de actuación orzadas en 18.750.000 euros (dos cales o 80% están financiados polos Fondos FEDER) e os fondos complementarios achegados polo Concello da Coruña, alcanzando un total de 33.350.000 € para as 12 liñas de actuación restantes.

Beneficios

A implantación da Estratexia EidusCoruña busca converter A Coruña nunha cidade sustentable, intelixente e integradora, e serán moitos e diversos os beneficios que lle proporcionarán.

• Aproveitamento de espazos públicos: unha cidade que xere espazos de titularidade pública de alto valor ambiental e social. Preténdese obter un maior aproveitamento de todas as oportunidades que a cidade ofrece para mellorar a calidade urbana e ambiental dos seus barrios así como do seu bordo litoral e o seu ámbito fluvial, articulados todos eles para maior beneficio da cidadanía.
• Garantía de eficiencia na xestión dos recursos naturais. Debemos garantir a eficiencia na xestión de todos os recursos naturais dispoñibles no ámbito municipal. Neste sentido a cidade conta cun importante patrimonio en materia de xestión de auga, polo que se fai preciso manter este servizo e dotalo de sentido metropolitano, xa que a auga constituirá un ben de primeira orde.
• Promoción de mobilidade sostenible: búscase recuperar para a cidadanía os espazos excesivamente abarcados polo vehículo privado na cidade compacta mediante a ampliación e mellora dos servizos de mobilidade eco-eficiente: vías peonís e ciclables, xunto á potenciación, integración e coordinación das redes urbanas e supramunicipais do transporte urbano colectivo en relación á futura construción da estación intermodal.
• Redución de pegada de carbono: a cidade dispón de marxe de mellora en canto á redución da emisión de gases de efecto invernadoiro e na implantación de medidas de eficiencia enerxética. Por tanto, profundarase na promoción dun modelo de mobilidade non motorizada e a implantación da eficiencia enerxética xeneralizada na xestión do municipio. Iso conducirá a unha redución da pegada de carbono, contribuíndo á mitigación do cambio climático.
• Smartcity e TIC: a cidade afanarase no concepto Smartcity, promocionando as TIC para, de maneira transversal, facilitar o máximo posible a consecución dos obxectivos marcados para a presente estratexia, pero de maneira específica para facilitar a mobilidade da cidadanía e a súa participación directa nos asuntos transcendentais da cidade.
• Dinamización económica: o municipio impulsará o seu sector produtivo mediante a promoción das TIC aplicadas á formación de activos laborais, o impulso da innovación, o aproveitamento do potencial de emprendemento e a creación de empresas na cidade (nos sectores cultural, creativo e turístico), ademais de fomentar o comercio local e de proximidade, con epicentro nos mercados de barrio e nas feiras especializadas.
• Inclusión social: A Coruña debe ser un municipio socialmente amable, que colabora na mellora das condicións socioeconómicas e de habitabilidade dos colectivos vulnerables e a igualdade de xénero e diversidade. Búscase reducir a brecha económica e social entre colectivos e barrios, así como erradicar os asentamentos precarios aínda existentes.