A Xunta de Goberno Local acordou hoxe unha redución do 50% do canon asociado ás concesións do mercado de Monte Alto para o que resta deste ano.

"Na Xunta de Goberno Local de finais de xaneiro aprobamos suspender os prazos das concesións aos praceiros de Monte Alto ata que se completen as obras de rehabilitación do antigo mercado. É dicir, que o período de execución das obras non computará como tempo transcorrido para os efectos das concesións en vigor de praceiras e praceiros. A esta medida aprobada en xaneiro aparellamos hoxe unha máis, para apoiar as praceiras e praceiros mentres estén a desenvolver a súa actividade no mercado provisional da praza Indalecio Prieto", explicou a alcaldesa, Inés Rey, na rolda de prensa posterior á Xunta de Goberno.

Por iso, con efecto retroactivo desde o pasado 1 de febreiro, e ata finais deste exercicio, reducirase á metade o canon que pagan as e os concesionarios.