O concelleiro de Cultura e Turismo, Gonzalo Castro, presentou hoxe a nova edición da Romaría dos Castros, unha cita xa consolidada no calendario festivo da cidade que reunirá no Parque de San Diego, entre os días 17 e 19 de xullo, música tradicional, actividades populares e propostas para todos os públicos. No acto de presentación participaron tamén o presidente da Asociación de Veciños Oza-Gaiteira-Os Castros, Paulo Sexto, o fundador e líder de Luar na Lubre, Bieito Romero, e o músico e investigador Xurxo Fernandes, dous dos artistas que forman parte do cartel desta edición.

Gonzalo Castro subliñou que a Romaría dos Castros forma parte da aposta do Goberno de Inés Rey polo apoio ás festas dos barrios, "espazos que fortalecen os vínculos veciñais e contribúen a preservar e divulgar o patrimonio cultural e musical galego". A celebración arrancará o venres 17 cun pasarrúas de Cántigas da Terra, ao que seguirá o pregón, que nesta edición correrá a cargo de Maika e Willy Sieiro Vázquez, fillos de Víctor Sieiro, unha figura moi querida no barrio dos Castros e no deporte coruñés.

A elección dos pregoeiros supón unha homenaxe á memoria de Víctor Sieiro Asorey, veciño dos Castros e pioneiro do fútbol sala feminino na Coruña. Fundador, presidente e adestrador do histórico Sal Lence, foi unha das persoas que impulsou o desenvolvemento desta disciplina deportiva desde o barrio ata convertela nun referente a nivel estatal. O club conquistou numerosos títulos nacionais e internacionais, contribuíndo de maneira decisiva á visibilidade e normalización do deporte feminino. Desde a organización destacan tamén o compromiso de Sieiro coa vida social e comunitaria dos Castros, motivo polo que os seus fillos serán os encargados de abrir oficialmente a Romaría deste ano. Tras o pregón actuarán Tres Pesos e Xurxo Fernandes, que presentará o seu espectáculo 'Levaino!'.

A programación continuará o sábado 18 cunha alborada e pasarrúas a cargo de Donaire, seguida da sesión vermú do grupo Maghúa, un xantar popular, xogos tradicionais e a actuación da Orquestra Pantasma. Xa pola noite subirán ao escenario Acordeireta e Luar na Lubre, unha das formacións máis representativas da música folk galega, nun dos concertos máis destacados de toda a fin de semana. A xornada rematará coa sesión de DJ Misa.

O domingo 19, último día da romaría, volverá soar a música tradicional co grupo de Donaire, protagonista da alborada e da actuación do mediodía. Tras o xantar popular, o grupo Pan Sen Fron será o encargado de poñer o peche festivo á celebración.

A Romaría dos Castros está organizada pola Asociación de Veciños Oza-Gaiteira-Os Castros, en colaboración co Concello da Coruña, e constitúe unha das citas máis destacadas do verán nos barrios, combinando tradición, música e convivencia veciñal nun espazo emblemático como o Parque de San Diego.