O Concello da Coruña colabora coa Asociación de Comerciantes do Castrillón, Eirís e Monelos (Acocem) na organización do Día da Familia, que se celebrará este sábado 7 e domingo 8 no parque de Eirís con numerosas actividades lúdicas e festivas para todas as idades. O Goberno de Inés Rey continúa a promover eventos nos barrios que lle permitan á cidadanía confraternizar e contar con actividades de ocio de proximidade.

O Día da Familia prolongarase desde o sábado ás 11.00 ao domingo ás 21.00 horas con numerosas actividades para todos os públicos. Haberá ambos os días unha feira de comercio, artesanía e hostalería, aberta durante toda a xornada; tamén obradoiros infantís e xuvenís e haberá atraccións de distinto tipo abertas todo o día. O sábado terá lugar a partir das 11.00 horas o torneo de fútbol infantil da SD Eirís. Tamén ás 11.00 horas actuará o grupo Musicoterapia, ás 12.00 haberá unha sesión de teatro de Kids&Us e ás 13.00 horas actuará A Trova Coruñesa.

Xa pola tarde, a partir das 15.00 horas, haberá actividades a cargo da ADC Alquimia Inline: proba de patíns en liña, concurso de tiros a porta de hóckey e exhibición de freestyle. Ás 16.30 horas haberá unha charla de InDiCan (Iniciativa Dignidade Canina) e unha coreografía de Artestudio. Ás 17.00 horas haberá unha sinatura de libros de María García da súa obra 'El renacer de los girasoles' (que estará tamén o domingo ás 13.00 horas) e unha actuación da Casa de Aragón. Ás 18.00 horas terá lugar o pregón a cargo do actor César Cambeiro. O día pecharase cunha batalla de galos ás 19.00, a actuación musical de O Tren da Unha ás 22.00 e de DJ Pukas a partir da 01.00 da mañá.

O domingo a xornada comezará coa celebración dunha carreira infantil a partir das 10.00 horas. Ás 12.00 horas terá lugar un torneo de fútbol xuvenil e ás 13.30 horas haberá unha actuación musical a cargo de Begoña García. Pola tarde, ás 17.00 horas, levarase a cabo o torneo de fútbol feminino, mentres que ás 19.00 horas será o de categoría masculina da SD Eirís. Ás 17.30 haberá un desfile de moda e peiteado e a xornada finalizará cunha festa Holi ás 19.00 horas.