O Concello da Coruña colabora xunto coa Asociación de Veciños do Ventorrillo na celebración da primeira edición de A Parrochiña, unha nova iniciativa veciñal que nace no Ventorrillo coa vocación de recuperar o espírito das festas populares de barrio a través da convivencia, a gastronomía e a música en directo. O evento terá lugar o vindeiro 11 de xullo na praza Salvador de Madariaga a partir das 13.00 horas.

A Parrochiña xorde da iniciativa dun grupo de veciños e veciñas do barrio que, coa vontade de crear un novo espazo de encontro para a comunidade, decidiron impulsar unha celebración aberta á participación de toda a cidadanía. O concelleiro de Cultura e Turismo, Gonzalo Castro, xunto co organizador, Luis Suárez, destacou o valor deste tipo de iniciativas que nacen desde o tecido veciñal. "Os barrios son unha parte fundamental da identidade da Coruña e proxectos como A Parrochiña contribúen a fortalecer os lazos comunitarios e a crear espazos de encontro interxeracional a través da cultura e da convivencia", sinalou. Destacou a vontade da alcaldesa, Inés Rey, para que as celebracións nos barrios teñan entidade propia, coma neste caso.

A programación terá como un dos seus principais atractivos un xantar popular, pensado para reunir familias, amizades e veciñanza arredor da mesa, recuperando unha das tradicións máis características das celebracións populares. A proposta gastronómica estará acompañada dunha programación musical que se prolongará durante toda a xornada. O cartel do evento inclúe un xantar popular con parrochiñas e churrasco, sesión vermú e actuacións musicais para todos os públicos.

A sesión vermú contará coa actuación de El Corta, encargado de abrir a programación musical. Ao longo da tarde e da noite pasarán tamén polo escenario Os Alcántara, Clandestinos e o DJ Hugo Mosquera, configurando unha oferta pensada para diferentes xeracións e estilos musicais.

A festa prestará tamén unha especial atención ao público infantil, cun espazo específico dedicado ao lecer familiar. Durante a tarde instalaranse xogos tradicionais e artesanais de madeira, así como outras actividades de participación, entre elas un touro mecánico, para que os máis pequenos tamén formen parte dunha xornada concibida para gozar en comunidade.

Desde a organización destacan que A Parrochiña nace cunha vocación de continuidade e coa intención de consolidarse como unha cita anual. O seu obxectivo é contribuír a crear novos recordos colectivos, fortalecer as relacións veciñais e manter vivas as tradicións populares dos barrios coruñeses. "O máis importante desta iniciativa é a súa capacidade para facer barrio, para xuntar persoas de diferentes idades arredor dunha mesma celebración e para reivindicar o papel dos barrios como espazos vivos de convivencia e participación", concluíu Castro.