Pablo Bocelo e Vanessa Hervada gañaron hoxe a carreira popular dos Rosales, que celebrou a súa décimo segunda edición coa participación de case 1.200 persoas entre as diversas categorías, desde persoas adultas a inferiores e peques.

Pablo Bocelo e Vanessa Hervada, que chegaron á liña de meta cuns tempos de 19,43 e 25,11, respectivamente, foron os máis rápidos en completar un percorrido novidoso, de case seis quilómetros, e que este ano arrincou polas rúas interiores do barrio dos Rosales para saír a continuación ao paseo do Portiño, por onde discorreu a meirande parte da proba ata chegar ao alto do paseo, coa chegada á contorna do pavillón polideportivo municipal.

"Nesta edición démoslle un pequeno xiro ao trazado da categoría absoluta para potenciar a identidade da carreira e adentrala aínda máis no barrio. E, ao facela en sentido inverso con respecto ao 2024, tamén evitamos a pendente final con subida desde o Millennium", razoou Manuel Vázquez.

O circuíto volverá o 14 de setembro, coa Volta a Oza

A cuarta proba do calendario de Coruña Corre realizouse cun ambiente festivo, tal e como destacou hoxe o concelleiro de Deportes, Manuel Vázquez. "Rematamos a primeira parte da tempada, con boas sensacións e cifras de participación nas carreiras da Torre, Matogrande-Xuxán, San Pedro de Visma e tamén aquí, nos Rosales. Estamos a vivir unha edición moi especial, con milleiros de persoas tanto da Coruña como da súa contorna. E, ademais, vemos que o público familiar está moi implicado e a rapazada está a gozar das carreiras, que é un dos nosos obxectivos principais para o circuíto a medio e longo prazo", expuxo Vázquez.

Agora, coa chegada do verán, o circuíto Coruña Corre fará o seu parón habitual para volver xa a mediados de setembro, coa Volta a Oza (14 de setembro) e, xa posteriormente, as carreiras do Ventorrillo (26 de outubro) e Novo Mesoiro (23 de novembro).

Con máis de 2.100 persoas inscritas no conxunto do circuíto -o que permite participar en todas as carreiras da tempada-, o concelleiro lembrou que tamén é posible inscribirse individualmente en cada proba. "No caso da Volta a Oza, abriremos o prazo nas semanas previas á súa disputa", concretou Vázquez.