O proxecto propón un espazo de aprendizaxe, reflexión crítica e participación activa orientado a fortalecer as competencias persoais e sociais necesarias para desenvolverse de forma segura, responsable e sustentable na mobilidade cotiá.

A través do traballo sobre valores como a responsabilidade individual, a corresponsabilidade social, a solidariedade, a prudencia e o respecto ás demais persoas, o alumnado desenvolve habilidades relacionadas coa percepción do risco, a toma de decisións, a convivencia e o exercicio dunha cidadanía responsable, en consonancia coas competencias clave do sistema educativo.

O proxecto estrutúrase nunha actividade teórica principal e varias actividades prácticas complementarias e opcionais, que permiten consolidar as aprendizaxes mediante experiencias vivenciais, a reflexión compartida e a participación activa do alumnado.

Actividade teórica: obradoiro de mobilidade sustentable e segura

O obradoiro de mobilidade sustentable e segura ten unha duración de 50 minutos.

Desenvólvese unha sesión de sensibilización na aula apoiada en recursos multimedia e dinámicas participativas. O obxectivo é promover a aprendizaxe significativa ao redor dunha mobilidade responsable, segura e sustentable. Trabállase desde unha perspectiva educativa e vivencial e promóvese a reflexión e o pensamento crítico.

Actividades prácticas complementarias (opcionais)

Estas actividades teñen carácter vivencial e reforzan as aprendizaxes adquiridas na fase teórica.

A duración mínima é dunha clase de 50 minutos e a máxima de dúas clases (no caso do simulacro).

• Obradoiro de comunicación asertiva; aprender a dicir NON: dicir "NON" ante situacións de presión ou risco non é unha capacidade innata, senón unha habilidade que se aprende e adestra. Con esta intervención educativa contribúese ao desenvolvemento das habilidades sociais do alumnado e proporciónanselle ferramentas prácticas para afrontar, de forma firme e respectuosa, situacións que poidan comprometer a súa seguridade na mobilidade. A través de dinámicas participativas, trabállanse técnicas de comunicación asertiva que fortalecen o autocontrol, a autoestima e a toma de decisións conscientes e promoven así unha actitude preventiva e responsable ante a condución e a mobilidade cotiá.
• Detectives da mobilidade: este obradiro propón unha actividade práctica de observación e análise da contorna do centro educativopara identificar riscos, puntos críticos e barreiras que afectan á mobilidade cotiá. O alumnado traballa de maneira colaborativa para detectar comportamentos inseguros e dificultades estruturais e desenvolver así unha conciencia crítica e responsable. Como resultado, foméntase a capacidade de propoñer solucións e melloras que contribúan a unha mobilidade máis segura e sustentable.
• Simulacro de sinistro viario: en colaboración cos servizos de emerxencias (Bombeiros, Policía Local, servizos sanitarios), realízase un simulacro de sinistro de tráfico. Esta actividade ten un forte compoñente vivencial e educativo, orientado a favorecer a toma de conciencia sobre as consecuencias das condutas de risco na mobilidade e a promover unha reflexión crítica sobre a importancia da prevención.
• Tras o simulacro, ábrese un espazo de diálogo onde os participantes reflexionan en grupo, cóntase, sempre que sexa posible, co testemuño dunha persoa vítima dun sinistro viario. Esta experiencia favorece a interiorización de valores preventivos e a adopción de condutas responsables.

Este curso ponse en marcha unha nova liña específica centrada na mobilidade segura en vehículos de dúas rodas, a través do proxecto "Todo vai sobre 2 rodas: o casco é o teu seguro de vida. Pensa, protéxete, circula!", dirixido á sensibilización da mocidade sobre mobilidade segura e responsable no uso de bicicletas, patinetes eléctricos e ciclomotores.

O obradoiro aborda cuestións relacionadas co uso do casco e doutros elementos de protección, factores de risco, normativa, convivencia viaria e mobilidade responsable, mediante dinámicas participativas e exemplos prácticos adaptados ao alumnado.