REDE DE ESCOLAS INFANTÍS MUNICIPAIS

Escola	Dirección	Horario do centro	Horario escolar
EIM A Caracola	R/ Illas Cíes s/n (Novo Mesoiro)	Luns a venres das 07:00 ás 17:00 h	08:00 a 16:00 h
EIM Agra do Orzán	R/ Alcalde Liaño Flores, s/n (Agra do Orzán)	Luns a venres das 07:00 ás 17:00 h	08:00 a 16:00 h
EIM Arela	Avda. de Oleiros, s/n (Elviña)	Luns a venres das 07:00 ás 17:00 h	08:00 a 16:00 h
EIM Carricanta	R/ José M. Hernansáez, 11 (Castrillón)	Luns a venres das 07:00 ás 17:00 h	09:00 a 17:00 h
EIM Os Rosales	R/ Alfonso R. Castelao, s/n (Os Rosales)	Luns a venres das 07:00 ás 17:00 h	09:00 a 17:00 h
EIM Luis Seoane	R/ Vixía, s/n (Monte Alto)	Luns a venres das 07:00 ás 17:00 h	09:00 a 17:00 h
EIM Monte Alto	R/ Forcarei, s/n (Monte Alto)*	Luns a venres das 07:00 ás 17:00 h	09:00 a 17:00 h
EIM Os Cativos	Lugar Río de Quintás, 1 (Palavea)	Luns a venres das 07:00 ás 17:00 h	08:00 a 16:00 h

*Actualmente comparte espazo coa EIM Luís Seoane.

CALENDARIO DO PROCESO DE ADMISIÓN

Trámite	Data/prazo
Prazo de solicitude de renovación de praza	Do 9 ao 12 de marzo
Prazo de solicitude de traslado de praza	Do 9 ao 12 de marzo
Publicación de prazas vacantes para o curso 2026/2027	13 de marzo
Preinscrición en liña e solicitude por rexistro	Do 16 ao 30 de marzo
Publicación das solicitudes presentadas	4 de maio
Prazo de presentación de alegacións e emenda contra a listaxe de solicitudes	Do 5 ao 18 de maio
Publicación da resolución provisional	8 de xuño
Prazo de presentación de alegacións contra a resolución provisional	Do 9 ao 22 de xuño
Publicación da resolución definitiva	30 de xuño
Prazo de matrícula	Do 1 ao 10 de xullo

PRAZAS VACANTES PARA O CURSO 2026-2027

EIM	0-1 ANOS (2026)	1-2 ANOS (2025)	2-3 ANOS (2024)	TOTAL VACANTES
Arela	16	23	22	61
Monte Alto	8	13	23	44
Os Cativos	16	10	19	45
Luís Seoane	8	29	20	57
Caracola	16	10	14	40
Carricanta	16	23	21	60
Os Rosales	24	16	22	62
Agra do Orzán	16	10	17	43
TOTAL	120	134	158	412

BASES DO PROCESO DE ADMISIÓN

As bases reguladoras do proceso de admisión nas escolas infantís integradas na REIM para o curso 2026-2027, que inclúen toda a información relativa ao proceso, pódense consultar no apartado de "Documentos relacionados", situado na parte inferior desta mesma páxina.

SOLICITUDE DE RENOVACIÓN OU RESERVA DE PRAZA NA EIM

As persoas proxenitoras, titores/as ou representantes legais dos/as menores que xa estean matriculados/as na REIM do Concello da Coruña no curso 2025-2026 e que desexen renovar a praza para o próximo curso 2026-2027 terán dereito a reservar unha praza na escola infantil onde están matriculados/as, para o que deberán presentar na mesma escola infantil a seguinte documentación:

• Modelo de ficha de reserva de praza facilitada pola escola.
• Libro de vacinas actualizado.
• Calquera outra documentación que a escola considere necesaria para prestar o servizo.

O prazo para solicitar a reserva de praza será do 9 a 12 de marzo de 2026, no horario de apertura da escola infantil.

Non poderán solicitar a reserva de praza as persoas que no momento de formalizar a solicitude manteñan mensualidades impagadas por algún dos servizos complementarios.

A persoa solicitante recibirá unha comunicación por parte da propia escola infantil municipal onde se lle comunicará se o/a menor ten praza dispoñible para o curso 2026/2027 na escola onde solicita a renovación da praza. Se non a tivese, daráselle unha alternativa de traslado.

En última instancia, de non ter praza reservada, deberá realizar a solicitude de novo ingreso de acordo co procedemento establecido nas bases de admisión.

SOLICITUDE DE TRASLADO DE PRAZA

As persoas proxenitoras, titores/as ou representantes legais dos/as menores que xa estean matriculados/as nunha escola da REIM no curso 2025-2026 poderán solicitar o traslado da súa matrícula a outra escola da REIM, cando existan prazas libres nesa, sempre que, no momento da solicitude, se cumpran as seguintes condicións:

• Que no momento de formalizar a solicitude non existan mensualidades impagadas por algún dos servizos complementarios.
• Que se conte cun irmán ou unha irmá escolarizado/a na escola infantil solicitada.
• No caso dun ou dunha menor con NEAE é necesario que o centro de destino teña algunha praza dispoñible para menores con NEAE na unidade na que solicita ingresar.

A solicitude de traslado presentarase na secretaría da escola infantil na que se desexe ingresar, entre o 9 e o 12 de marzo de 2026, no horario de apertura da escola infantil.

A persoa solicitante recibirá unha comunicación por parte da escola infantil municipal onde se desexa ingresar de se o/a menor ten praza dispoñible para o curso 2026/2027.

De non dispoñer de praza, daráselle a opción de continuar na mesma escola infantil se así o desexa.

En última instancia, deberá realizar a solicitude de novo ingreso de acordo co procedemento establecido nas bases de admisión.

PROCESO DE ADMISIÓN PARA OS NOVOS INGRESOS (CARÁCTER PREFERENTE E ORDINARIO)

Tras finalizar o prazo de solicitude de traslados e reservas de praza, publicarase unha lista de prazas vacantes no taboleiro de anuncios de cada unha das escolas da REIM e na páxina web de Educación (https://www.coruna.gal/educacion). Seguidamente abrirase un prazo para a solicitude de prazas de novo ingreso.

A publicación de prazas vacantes realizarase o día 13 de marzo de 2026. A partir desa data, comezará o prazo para solicitar unha praza de novo ingreso nunha das escolas infantís municipais.

Establécense dúas modalidades de novo ingreso:

Solicitude de novo ingreso de carácter preferente
Terán carácter preferente aquelas solicitudes de praza das/os proxenitores, titores/as legais ou representantes legais nas que concorra algunha das seguintes circunstancias: Os/as menores que se van matricular por primeira vez e que conten cun irmán ou cunha irmá escolarizado/a para o curso 2026-2027 nalgunha das escolas da REIM. Os fillos e fillas do persoal que presta servizos na escola infantil, coa condición de que existan prazas vacantes na escola infantil na que desexen matricular o/a menor. As prazas reservadas por urxencia social, por dárense algunhas das seguintes circunstancias: Menores tutelados/as ou en situación de garda por parte da Administración autonómica competente. Fillas e fillos de mulleres que estean en centros de acollida ou sexan vítimas de violencia de xénero. Menores que se atopen nun contexto sociofamiliar de risco social e que requiran unha intervención inmediata.
Documentación Todas as situacións enumeradas anteriormente deberanse acreditar documentalmente para xustificar o carácter preferente mediante a presentación da seguinte documentación: Menores que se matriculen por primeira vez e conten cun irmán ou cunha irmá matriculado/a nalgunha das escolas da REIM no curso escolar 2026-2027: Certificado da escola que acredite esta situación. Fillas/os do persoal que presta servizos na escola: Certificado emitido pola empresa que xestiona a escola infantil no que se sinale que o/a solicitante é persoal da empresa e que non se superan os límites de reserva de praza que se establecen no artigo 72 do convenio laboral. Urxencia social - Menores tutelados/as ou en situación de garda por parte da Administración autonómica competente: Resolución administrativa da situación da garda/tutela expedida polo órgano competente da Sdministración autonómica. Urxencia social - Fillos e fillas de mulleres que estean en centros de acollida ou sexan vítimas de violencia de xénero: Certificación da orde de protección ou da medida cautelar, ou testemuño ou copia autenticada pola secretaria ou o secretario xudicial da propia orde de protección ou da medida cautelar. Sentenza condenatoria na orde penal na que se acredite violencia de xénero. Certificación e/ou informe dos servizos sociais e/ou sanitarios da Administración pública autonómica ou local. Certificación dos servizos de acollida da Administración pública autonómica ou local. Informe do Ministerio Fiscal que indique a existencia de indicio de violencia. Informe da Inspección de Traballo e da Seguridade Social. Calquera outras que se establezan regulamentariamente. Urxencia social - Menores que se atopen nun contexto sociofamiliar de risco social e requiran dunha intervención inmediata: Informe do/a técnico/a do sistema de servizos sociais ou outros sistemas, no que se valore a urxencia social e se propoña como recurso idóneo para a atención do/a menor a escola infantil municipal, de maneira motivada e coherente cos obxectivos da intervención social proposta. Nas solicitudes de novo ingreso de carácter preferente de alumnado con necesidades específicas de apoio educativo (NEAE), deberá acreditarse a concorrencia desta circunstancia. Esta documentación deberá completarse coa indicada no apartado "Documentación e lugar de presentación".

Solicitudes de novo ingreso de carácter ordinario
As restantes solicitudes de novo ingreso que non teñan carácter preferente serán obxecto de baremación para a asignación de prazas, segundo o procedemento que se establece nos apartados seguintes.

CARÁCTER ORDINARIO

As restantes solicitudes de novo ingreso que non teñan carácter preferente serán obxecto de baremación para a asignación de prazas, segundo o procedemento que se establece nos apartados seguintes.

REQUISITOS DE ACCESO PARA O PROCESO DE ADMISIÓN DE NOVO INGRESO

Serán requisitos para solicitar praza na REIM:

1. Ter unha idade mínima de 3 meses o día de comezo do curso escolar e non ter cumpridos os 3 anos o 31 de decembro de 2026. Con todo, poderanse eximir do requisito do límite de idade de 3 anos os nenos e as nenas con necesidades específicas de apoio educativo, de acordo coa normativa vixente e co establecido nas bases.
2. Para solicitar unha praza de novo ingreso na REIM será necesario que a/o menor estea empadroada/ou con algunha das persoas proxenitoras ou, se fose o caso, co/a titor/a legal. Para determinar o domicilio tomarase como referencia o do/a solicitante.

Todas as persoas interesadas en obter unha praza de novo ingreso nunha escola infantil municipal, deberán presentar unha preinscrición a través da ficha especifica de "Solicitude de praza na escola infantil 2026-2027".

Esta preinscrición é un trámite previo necesario, pero para formular validamente a solicitude de praza deberá presentala, xunto co resto de documentación obrigatoria, no rexistro público, debidamente asinada por ambos/as os/as proxenitores/as, se fose o caso, e entregala, xa sexa de forma presencial ou a través do rexistro electrónico do Concello da Coruña (https://sede.coruna.gob.es).

CRITERIOS DE PRIORIDADE PARA AS SOLICITUDES DE NOVO INGRESO DE CARÁCTER ORDINARIO

1. En primeiro lugar, terán preferencia de acceso ás escolas solicitadas os/as nenos/as empadroados/as no Concello da Coruña con algunha das súas persoas proxenitoras ou representantes legais. Dentro destes/as menores, en primeiro lugar os/as que presenten solicitude de novo ingreso de carácter preferente.
2. En segundo lugar, no caso de existir prazas vacantes, terán preferencia os/as menores empadroados/as noutros municipios, sempre que algún dos seus proxenitores ou das súas proxenitoras ou representantes legais teña o seu posto de traballo no termo municipal da Coruña.
3. En terceiro lugar, se aínda quedasen vacantes, poderán optar os/as nenos/as doutros concellos.

Despois de aplicar o criterio de prioridade e só se existisen máis solicitudes que vacantes, procederase a baremar as solicitudes de acordo cos criterios que se indican a continuación.

CRITERIOS DE BAREMACIÓN

A baremación será única para todas as escolas e levarase a cabo tendo en conta os seguintes criterios:

A) Situación sociofamiliar. Puntuarase:

Situación sociofamiliar	Puntuación
Irmáns/irmás solicitando praza simultaneamente	4 puntos
Menor solicitante cunha discapacidade igual ou superior ao 33% ou grao de dependencia recoñecido	3 puntos
Proxenitor/a que forme parte da unidade familiar cunha discapacidade igual ou superior ao 33% ou grao de dependencia recoñecido	1 punto (máximo 2)
Condición de familia monoparental/monomarental	2 puntos
Condición de familia numerosa	2 puntos

B) Situación sociolaboral. Puntuarase:

Situación sociolaboral	Puntuación
Ocupación laboral das dúas persoas proxenitoras ou con impedimento acreditado para atender o/a neno/a	8
Ocupación laboral dunha das persoas proxenitoras ou con impedimento acreditado para atender o/a neno/a	4
Condición de familia monoparental/monomarental traballando ou con impedimento acreditado para atender o/a neno/a	8

CRITERIOS DE DESEMPATE

Situación económica

A puntuación asignada na situación económica da unidade familiar só se terá en conta cando exista un empate entre varias solicitudes de acordo coa puntuación obtida nas situacións sociofamiliar e sociolaboral.

Tramos de renda	Puntuación
Renda per cápita da unidade familiar inferior ao 30 % do IPREM	7
Renda per cápita da unidade familiar comprendida entre o 30% e o 50 % do IPREM	6
Renda per cápita da unidade familiar comprendida entre o 50% e o 75 % do IPREM	5
Renda per cápita da unidade familiar comprendida entre o 75% e o 100 % do IPREM	4
Renda per cápita da unidade familiar comprendida entre o 100% e o 125 % do IPREM	3
Renda per cápita da unidade familiar comprendida entre o 125% e o 150 % do IPREM	2
Renda per cápita da unidade familiar comprendida entre o 150% e o 200 % do IPREM	1
Renda per cápita da unidade familiar superior ao 200 % do IPREM	0

EMPATE NA PUNTUACIÓN - SORTEO DAS DÚAS PRIMEIRAS LETRAS DE PRIORIDADE

Se, despois de aplicar tamén o baremo da situación económica, persistise o empate entre varias solicitudes, resolverase a asignación de praza tendo en conta o resultado do sorteo público das dúas primeiras letras de prioridade, tanto para o primeiro apelido como para o segundo apelido. O dito sorteo realizarase no Servizo Municipal de Educación antes do inicio do período de solicitude de praza.

A data e a hora da realización do sorteo publicarase na web municipal (www.coruna.gal/educacion), como mínimo, un día antes da súa realización.

O resultado do sorteo publicarase tamén nesta mesma páxina web, como máximo dentro dos tres días seguintes á súa realización.

DOCUMENTACIÓN E LUGAR DE PRESENTACIÓN

Presentarase unha única solicitude, pedindo por orde de prioridade as escolas polas que se opta. Nesta solicitude poderán solicitar ata un máximo de dúas escolas. A adxudicación de prazas realizarase tendo en conta a escola infantil seleccionada como primeira opción.

A adxudicación dunha praza na escola indicada como primeira opción implicará a aceptación da súa matriculación (salvo renuncia expresa) e a eliminación da lista de espera na opción non adxudicada.

O alumnado incorporarase á escola o día de comezo do curso escolar, salvo causas xustificadas e valoradas polo Servizo Municipal de Educación.

A adxudicación dunha praza na escola indicada como segunda opción permitirá manter a situación en lista de espera na escola non adxudicada e elixida como primeira opción. Para a adxudicación das prazas atenderase ao disposto, en primeiro lugar, no apartado de "Criterios de prioridade" e se existen máis solicitudes que vacantes atenderase a continuación ao previsto nos apartados "Criterios de baremación" e "Criterios de desempate".

As persoas interesadas deben facer unha inscrición en liña na web municipal (www.coruna.gal/educacion) a través da ficha específica "Solicitude de praza na escola infantil 2026-2027". Acceso a "Solicitude de praza na escola infantil 2026-2027": https://edu.coruna.gal/infantil/solicitude/solicitude_publica_reim/

Despois de cubrir e completar a dita ficha, o sistema elabora un xustificante (documento PDF) que se envía ao correo electrónico facilitado. Este documento en Pdf, denominado ficha de preinscrición, conterá un número de identificación (IDE) que será o de referencia para cada expediente no procedemento. Dado o seu carácter de preinscrición, este xustificante é só un trámite previo necesario para poder formular validamente a solicitude da praza propiamente dita e non ten en ningún caso a consideración de solicitude da praza nunha escola infantil para o curso 2026-2027.

Unha vez recibida a dita ficha de preinscrición deberá imprimirse e ser asinada polos dous proxenitores ou dúas proxenitoras ou titores/as e, xunto co resto da documentación requirida nestas bases, deberá presentarse no rexistro electrónico do Concello da Coruña (https://sede.coruna.gob.es), no Rexistro Xeral do Excmo. Concello da Coruña ou a través de calquera outro medio dos establecidos no artigo 16 da Lei 39/2015, do 1 de outubro, do procedemento administrativo común das administracións públicas.

Documentación

Para as solicitudes de novo ingreso con carácter preferente e con carácter ordinario, as persoas interesadas deberán achegar coa solicitude a seguinte documentación: Xustificante de confirmación da preinscrición en liña asinado polas dúas persoas proxenitoras. Só será necesaria unha sinatura no caso de familias monoparentais/monomarentais ou das persoas proxenitoras que teñan a patria potestade en exclusiva. Copia do anverso e reverso do DNI/NIE ou documento acreditativo en vigor da identidade das dúas persoas proxenitoras. De ser o caso, o pasaporte ou Certificado de Rexistro de Cidadán da Unión. Neste caso deberá presentarse xunto co documento de identidade do país de orixe. Copia do libro de familia, certificado de nacemento ou, na súa falta, outro documento que acredite oficialmente a filiación do/a menor. Se aínda non naceu o/a menor para quen se solicita a praza, certificado médico que indique a posible data prevista para o seu nacemento. Nestes casos a condición de nado/a deberá acreditarse no momento de realizar a matrícula na escola asignada. No caso de separación ou divorcio, sentenza ou documentación acreditativa conforme o/a menor está a cargo da persoa solicitante ou ben goza de custodia compartida. No caso de alumnado con necesidades educativas especiais, deberá acreditarse a concorrencia desta circunstancia. No caso de menores empadroados/as fóra do Concello da Coruña, presentarase o certificado de padrón onde se acredite que o/a menor reside con algunha das súas persoas proxenitoras. As solicitudes de novo ingreso con carácter preferente deberán presentar a documentación acreditativa do cumprimento dalgún dos requisitos sinalados para ter dereito ao ingreso preferente, tal e como se recolle no apartado PROCESO DE ADMISIÓN PARA OS NOVOS INGRESOS (CARÁCTER PREFERENTE E ORDINARIO). En caso de non achegala, a solicitude será valorada con carácter ordinario. Os/as residentes noutros municipios, que traballen no Concello da Coruña, deben achegar un certificado de empresa no que conste que a persoa traballa nun centro de traballo con domicilio na Coruña. No caso de non autorizar na preinscrición en liña a consulta dos datos tributarios deberá achegar a/s declaración/s da renda dos membros da unidade familiar correspondente/s ao exercicio 2024. Para os casos nos que non sexa posible a obtención de datos económicos para ambos/as ou algunha das persoas proxenitoras (non constar dados/as de alta no censo de contribuíntes, persoas sen DNI/NIE ou persoas sen exercicio profesional ou laboral en España dende a súa chegada ao país) será obrigatorio que se presente unha declaración responsable, que deberá estar asinada polos/as proxenitores/as afectados/as por esta circunstancia. Cada persoa proxenitora deberá facer constar os seus ingresos obtidos nos últimos doce meses, así como a súa procedencia. Xunto coa declaración xurada deberá entregar a súa vida laboral e, no caso de traballar en España, copia de: As nóminas do últimos seis meses anteriores á data da solicitude, no caso de traballadores/as por conta allea. As declaracións tributarias trimestrais relativas ao período anterior, no caso de traballo por conta propia. As persoas empadroadas no Concello da Coruña, de non autorizar a consulta do padrón na preinscrición en liña, deberán entregar un certificado de padrón que acredite a residencia no concello do/a solicitante con algunha das persoas proxenitoras. A falta de presentación dalgún dos documentos dentro do prazo de presentación da solicitude e de corrección ou emenda supoñerá a exclusión do proceso.

Outra documentación para os efectos de valoración

No caso de familias monoparentais/monomarentais, o certificado vixente no prazo de presentación de solicitudes expedido pola Dirección Xeral de Familia, Infancia e Dinamización Demográfica ou o órgano competente da Administración autonómica. No caso de non autorizar na preinscrición en liña a consulta do grao de discapacidade, débese presentar o certificado expedido polo órgano competente do grao de discapacidade. Resolución do recoñecemento do grao de dependencia do/a menor ou de recoñecemento dalgunha medida de apoio para o exercicio da súa capacidade xurídica. No caso de non autorizar na preinscrición en liña a consulta do certificado de vida laboral, débese achegar o dito certificado actualizado a data de presentación de solicitudes. No caso de traballadores/as por conta propia, aínda que se autorice a consulta deben presentar o recibo de pago da cota da Seguridade Social ou da correspondente mutualidade do mes anterior ao período da solicitude. Nos casos de excedencia laboral por coidado de fillos/as das persoas proxenitoras ou titoras, para obter a puntuación no apartado de situación sociolaboral, ademais de autorizar a consulta ou presentar o certificado de vida laboral actualizado a data de presentación de solicitudes, deben presentar a documentación correspondente que acredite que a data de finalización da excedencia coincide, como máximo, co mes de incorporación do/a menor á escola infantil. De ser o caso, a xustificación acreditativa do impedimento das persoas proxenitoras para atender o neno ou a nena. No caso de non autorizar na preinscrición en liña a consulta do certificado de familia numerosa, débese presentar o certificado vixente a data de presentación de solicitudes expedido polo órgano competente. A falta de presentación dalgún dos documentos recolleitos neste apartado dentro do prazo de presentación da solicitude e emenda supoñerá a non valoración no apartado correspondente.

Lista de espera

A lista de espera, elaborada por grupos de idade, estará formada por aquelas solicitudes de nova admisión presentadas dentro dos prazos establecidos e que non obtiveron praza, ordenadas segundo o posto e a puntuación alcanzada conforme aos criterios de prioridade e baremación regulados nestas bases.

Elaborarase unha lista de espera única para toda a rede de escolas infantís municipais que estará publicada na páxina web municipal. A lista de espera estará actualizada en todo momento.

A lista de espera será válida ata o 31 de decembro de 2026. Non se realizarán mais chamamentos a partir desa data.

As vacantes que se produzan durante o curso escolar nalgunha das escolas infantís municipais iranse cubrindo coa lista de espera ofertando as prazas vacantes por orde. Ofertaranse vacantes en calquera das escolas infantís municipais por se é de interese para a familia. Se non se acepta, continuarase na lista de espera na mesma posición para un futuro chamamento.

O chamamento da lista de espera farase dende o Servizo Municipal de Educación. De non haber resposta no prazo máximo de tres días hábiles dende o día de remisión da mensaxe de correo electrónico, contactarase coa seguinte solicitude que lle corresponda por orde.

A formalización da matrícula, unha vez aceptada a vacante, deberá tramitarse directamente na escola infantil asignada. Unha vez aceptada a vacante e formalizada a matrícula causará baixa na lista de espera.

É responsabilidade de cada solicitante manter actualizados os datos de localización (teléfonos, enderezo, correo electrónico etc.) que se achegaron no seu día coa solicitude da praza, co fin de que poida ser chamado da listaxe de espera.

Todas as persoas interesadas en obter unha praza nova nunha escola infantil municipal deberán presentar unha preinscrición a través da ficha específica de "Solicitude de praza curso 2026-2027".

A preinscrición en liña deberase realizar entre o 16 e o 30 de marzo de 2026.

No apartado "Documentación e lugar de presentación" indícanse as consideracións para ter en conta á hora de realizar a preinscrición.

Cabe destacar que esta preinscrición é un trámite previo necesario pero, para formular validamente a solicitude de praza, a persoa interesada deberá presentala, xunto co resto de documentación obrigatoria, no rexistro público, debidamente asinada por ambas as persoas proxenitoras, se fose o caso, e entregala, xa sexa de forma presencial ou a través do rexistro electrónico do Concello da Coruña (https://sede.coruna.gob.es).

Acceso a "Solicitude de praza na escola infantil 2026-2027": https://edu.coruna.gal/infantil/solicitude/solicitude_publica_reim/