Este programa ofrece unha solución para a conciliación familiar e laboral no propio centro educativo ao longo de tres semanas no mes de setembro. As persoas participantes realizarán xogos, deportes e actividades lúdicas e participarán nunha emocionante aventura onde se promoven hábitos e normas de convivencia e se fomenta o desenvolvemento cognitivo, psicomotor e social.

ORGANIZACIÓN DAS ACTIVIDADES

A oferta de Cóxegas para cada centro será determinada pola súa ANPA, conforme á proposta de lecer da federación, e deberá ser aprobada polo Consello Escolar.

A Federación das ANPA valorará a viabilidade das actividades e poderá propoñer alternativas nos seguintes casos:

1. Cando non se consiga o número mínimo de participantes.
2. Cando se careza de persoal, materiais ou instalacións adecuadas.
3. Se un grupo xa iniciado queda por baixo do número mínimo debido a baixas ou ausencias.

ADXUDICACIÓN DE PRAZAS

No caso de existir limitacións por razóns organizativas ou de espazo, as prazas asignaranse por rigorosa orde de inscrición.

CONDICIÓNS DE PARTICIPACIÓN

• Cumprir as normas de convivencia do centro e manter unha actitude de respecto no desenvolvemento das actividades. En caso de non cumprirse aplicarase o protocolo disciplinario correspondente.
• A falta de asistencia continuada sen xustificación poderá supoñer a expulsión do programa sen dereito a devolución da cota aboada. Esa vacante poderá ser ocupada por outro/a escolar que a necesite por estar na listaxe de agarda.
• BAIXAS: as solicitudes de baixa deberán facerse por escrito a través do correo electrónico: actividades@fedapascoruna.org, ata o 2 de setembro ás 12.00 h.
• Garantirase a devolución da cota no caso de que:

1. Se comunique a baixa dentro do prazo establecido.
2. Non se alcance o mínimo de 10 participantes para formar grupo.
3. Se produza unha causa de forza maior.