Esta actividade, enmarcada dentro da dinamización lingüística, está baseada na creación e posta en escena de monólogos da man de humoristas profesionais da nosa cidade. Non só potenciará a comprensión e a expresión oral, senón que tamén brindará un espazo único para descubrir novos talentos cómicos na aula.

Os monólogos, en galego, terán unha duración mínima de 3 minutos e máxima de 5. Para garantir unha duración adecuada, a versión escrita deberá contar cunha extensión aproximada de 400 a 700 palabras

Características do programa

O programa consta de:

1. Talleres formativos de iniciación á creación e interpretación de monólogos, co obxecto de darlle ferramentas ao alumnado para poder elaborar o texto e ter recursos para a posta en escena. A empresa adxudicataria, en coordinación co SME establecerá os períodos formativos.
   • Formación inicial para o alumnado: o alumnado participará en sesións de formación que abordarán a definición do tema do monólogo e a súa aproximación á comedia no tema descrito. Ao finalizar, asignarase unha persoa profesional da comedia, que guiará o grupo durante o resto do proceso.
   • Proceso creativo para desenvolver un texto e Selección: todo o grupo traballará en equipo no proceso creativo e na elaboración do monólogo en galego normativo, que será tutelado e corrixido por profesionais, ata puír o resultado.
   • Posta en escena: os profesionais de cada centro, visitarán o alumnado nas súas aulas para preparar a posta en escena e escoller un ou unha representante de cada grupo que defenderá o monólogo final na gala do concurso.
2. Celebración do concurso: a presentación dos monólogos farase nunha gala final na que un xurado cualificado elixirá os/as monologuistas gañadores/as nas distintas categorías. A gala pecharase coa entrega de premios.

Premios

Haberá un grupo gañador por cada categoría, que levará un premio consistente en 150,00 €, ademais de galardóns.

O xurado poderá propoñer outras mencións especiais, sen prestación económica, e no seu ditame poderá deixar deserto algún premio.

Gala final

A gala final desta edición terá lugar o xoves 7 de maio, ás 17.00 horas, no auditorio Ágora

14 estudantes de secundaria de 10 centros educativos subirán ao escenario para presentar os seus monólogos, tras un intenso proceso de aprendizaxe guiada por profesionais do humor entre 30 grupos de 752 alumnos/as.