Condicións do programa

1. Os centros poderán inscribir o seguinte número de grupos distribuídos por etapas educativas:

• Educación infantil e primaria: un máximo de 3 grupos por centro.
• Educación secundaria: un máximo de 2 grupos por centro.

2. Cada grupo representará a súa obra no seu centro e noutro centro da mesma etapa educativa e recibirá ao grupo de teatro dese centro, de maneira que será grupo anfitrión e grupo visitante.

3. As obras de teatro poderán ser representadas en horario escolar ou extraescolar

4. As representacións teatrais da Mostra axustaranse, como mínimo e máximo, á seguinte duración:

• Educación infantil: entre 10 e 20 minutos.
• Educación primaria: entre 15 e 30 minutos.
• Educación secundaria: entre 30 e 60 minutos.

5. Deberes dos grupos participantes:

• Garantir a presenza dunha persoa responsable durante a representación, que reciba e atenda ao grupo visitante.
• Contar cun espazo idóneo e os recursos necesarios para a representación da obra.
• O público asistente deberá estar formado por alumnado de idades similares e idóneas á temática das obras
• Facilitar a convivencia entre os membros dos grupos visitante e anfitrión.
• Cumprir co calendario e horarios establecidos para as representacións, como grupo anfitrión e visitante.
• Xustificar debidamente coas facturas correspondentes todos os gastos xerados pola realización da actividade e relacionados coa obra representada.

Calendario de representacións

Nesta XXXV edición participarán 13 centros educativos de Educación Infantil, Educación Primaria, ESO e Educación Secundaria da cidade, cun total de 15 grupos de teatro: 2 de Educación Infantil, 9 de Educación Primaria, e 4 de Educación Secundaria. En total, 320 alumnos/as, actrices e actores dirixidos por 12 profesores/as ou monitores de teatro.

Realizaranse un total de 30 representacións, segundo o seguinte calendario:

Gala final Mostra de Teatro Escolar 2026

O programa finalizará coa representación das obras gañadoras e a entrega de premios o venres 12 de xuño, ás 17:30 horas, no Forum Metropolitano.

Todas as representacións serán valoradas por un xurado composto por:

• Ana Judel Prieto, Técnica de Educación do Concello da Coruña
• Ramiro Neira Cortés, actor e narrador de tradición oral; director e produtor de proxectos teatrais en Galicia; docente de grupos de teatro escolar e afeccionado.
• Xosé Leis Martínez, graduado en Pedagoxía Teatral e Máster en Estudos Teatrais e Audiovisuais da UDC; actor de teatro e audiovisual; director e programador de festivais teatrais; docente de grupos de teatro escolar.

O xurado elixirá a mellor representación en cada unha das categorías (infantil, primaria e secundaria) e poderá propoñer mencións especiais.

Os criterios de valoración terán en conta: a dramatización da obra, a orixinalidade ou a adaptación do texto, a escenografía, o vestiario, a calidade, corrección e fluidez lingüística, e a coordinación do grupo.

Premios

Os premios serán entregados na gala final, tras a representación das obras. A entrega realizaraa o Concelleiro de Educación, Formación e Innovación Tecnolóxica, Juan Ignacio Borrego Vázquez; mentres que as mencións especiais serán entregadas polos membros do xurado.

Cada grupo gañador recibirá un cheque por valor de 100€. As posibles mencións non terán premio económico.