Este mércores, a Xunta de Goberno Local deu luz verde á Oferta Pública de Emprego (OPE) do Concello prevista para este ano. Tal como e explicou hoxe a alcaldesa, Inés Rey, en base ao máximo que permite a lei mediante a taxa de reposición, a OPE suma 94 postos, aos que habería que restar as nove incorporacións xa realizadas neste exercicio, polo que a cifra final de prazas a convocar é de 85 prazas  -72 para sectores prioritarios e 13 para sectores non prioritarios-.

Destas 85 prazas que se ofertarán este ano, un total de 30 están adscritas á Policía Local -ás que hai que sumar as cinco incorporacións za realizadas este ano ao Corpo, con efectivos procedentes da quenda de mobilidade-, 5 prazas para reforzar o servizo municipal de Bombeiros, 9 prazas de persoal administrativo e 5 prazas de auxiliar administrativo, entre outras.

Ademais, na Xunta de Goberno Local se estableceu o número de prazas e categorías que se cubrirán tamén na Policía Local pola quenda de mobilidade, tal e como marca a normativa vixente. Este ano serán 14: dez prazas de policía, dúas de oficial, unha de inspector e otra de inspector principal. No caso de cubrirse na súa totalidade, estas 14 prazas asociadas á quenda de mobilidade sumaranse ás 30 prazas en réxime de quenda libre que inclúe a Oferta Pública de Emprego, o que suporá a entrada de 44 novos axentes na Policía Local.