O luns 20 de abril ás 19 h. na Biblioteca Municipal Fórum Metropolitano, temos a presentación do libro "Madriña" de Antonio Tizón, publicado pola Editorial Elvira.

Organizado pola Av. Oza, A Gaiteira e Os Castros.

Acceso libre até completar capacidade.

SINOPSE:

No mesmo día de abril de 2010, aparecen os cadáveres de Ramiro Gallego Tenreiro, que descobren no cemiterio de San Epitafio, un caso do que se ocupará o comisario Sánchez Pereiro, xa xubilado, e o dun delincuente, O Globero, que localizan enterrado nun descampado do barrio de Eirís, un crime que lle toca resolver á súa filla Clara nada máis incorporase ao Corpo de Policía.

Mentres tanto, Gustavo, o fillo de Ramiro, entrega a Pereiro unha serie de gravacións feitas por María Dominga, a madriña, que recollen, mediante infinidade de contos e cantos, non só a vida daquela muller, senón a dos membros da súa familia, entre os que o investigador sospeita que se atopa o criminal.

A incorporación sorprendente desta voz, a de María Dominga, xunto ao xurdimento inesperado da maxia verbal de Carlos Oroza, e o exercicio de memoria que implica o retrato omnisciente dos quince personaxes que conforman a árbore xenealóxica familiar son tres das maiores peculiaridades desta novela, a quinta e última entrega da serie Sánchez Pereiro, á que, nesta ocasión, sen perder o seu carácter narrativo, en forma de libro, se lle dá especial relevancia á poesía e aos formatos multimedia.

Antonio Tizón:

Antonio Tizón Barral (Aranga, A Coruña, 1960) é licenciado en Ciencias da Información pola Universidade Complutense de Madrid, e traballou como xornalista e profesor nas Escolas de Arte e Superiores de Deseño de Ourense, Santiago e A Coruña. En 1996 publicou un libro de relatos, "In medias res", e o poemario "Ritmos". A partir de 2015, coa novela "A antesala luminosa", comezou a publicar en Xerais unha serie que ten como protagonista principal o policía Xosé Sánchez Pereiro, e que, en clave de xénero negro, pretende abordar, dende distintas perspectivas, o tema da loucura. A esa serie pertencen tamén as novelas "Un home estraño" (Xerais, 2018), Premio Cidade Centenaria de Ribeira, "Os incurábeis" (Xerais 2020) e "Lobos doentes" (Xerais 2023) . Como poeta publicou "Non hai espellos nos manicomios" (2019) nun proxecto multimedia sobre saúde mental que se pode ler na web www.nonhaiespellosnosmanicomios.org. Tamén foi galardoado no V Certamen Internacional de Relatos Cortos sobre Discapacidad con "Descifrando el significado", cunha edición a cargo do centro hospitalario Benito Menni. No 2025 publicou Coplas analfabetas coa Editorial Elvira.