Hoxe publícanse na Sede electrónica municipal as  Axudas económicas para persoas coidadoras  da convocatoria 2023. Son axudas para o pagamento de servizos destinados a promover o benestar social e autocoidado das persoas coidadoras. Publicouse tamén o extracto da convocatoria no Boletín Oficial da Provincia.

Mediante este procedemento convócanse e adxudícanse axudas económicas para o pagamento de servizos destinados a promover o benestar e o autocoidado das persoas coidadoras de persoas dependentes, que teñan recoñecido un grao III de dependencia e que estean atendidas polo servizo municipal de axuda no fogar, na súa modalidade de dependencia, de acordo coa correspondente resolución do programa individual de atención (PIA) de dependencia.

As axudas, de carácter individual, consistirán nunha achega económica que será, como máximo, de 500 euros para cada persoa beneficiaria, a condición de que esta cumpra os requisitos establecidos, como, por exemplo, que a persoa solicitante estea empadroada no termo municipal no mesmo domicilio que a persoa dependente que recibe os coidados.

Ademais, tamén será imprescindible estar ao corrente dos deberes fiscais coa Axencia Estatal da Administración Tributaria (AEAT), o Concello da Coruña e a Tesouraría Xeral da Seguridade Social.

Toda a información da convocatoria atópase na primeira ligazón desta noticia, referido á Sede electrónica do Concello da Coruña.