A astrofísica coruñesa Isabel Suárez Fernández falará do tema central da súa tese, os fenómenos críticos en colapso gravitacional, na conferencia «Fenómenos críticos en colapso gravitacional, ondas gravitacionais e folerpas de neve. Que teñen que ver?», que terá lugar no planetario da Casa das Ciencias o vindeiro mércores 4 de xaneiro ás 19.30 h.

Estes fenómenos fascinantes teñen lugar en espazo-tempos extremos, e conéctanse con cousas tan cotiás como poñer unha pota de auga á o lume ou coas folerpas de neve. Na charla explicará conceptos básicos como que son un buraco negro, as ondas gravitacionais, as transicións de fase, os espazos-tempo extremos e todo o necesario para chegar a entender e comprender este tipo de fenomenoloxía tan peculiar e interesante.

Isabel Suárez Fernández estudou o Grao en Física na Universidade de Santiago de Compostela, onde tamén realizou un máster en Física. Traballou para o IGFAE (Instituto Galego de Física de Altas Enerxías) en física de partículas e despois doctourouse en Física Teórica en Lisboa, no Instituto Superior Técnico. A súa especialidade é a relatividade numérica, que aplica no seu posto actual de investigadora posdoutoral na Universidade das Illas Baleares no grupo de ondas gravitacionais, xunto co doutor Sascha Husa e a doutora. Alicia Sintes.

Coa colaboración da Agrupación Astronómica Coruñesa Ío.