O Grupo Municipal Socialista levará ao próximo pleno unha proposta para crear un Consorcio de Transporte Metropolitano por estrada para coordinar e xestionar o transporte de viaxeiros na cidade e no conxunto dos municipios da área. Os socialistas entendemos que este ente debe ser un paso previo ao desenvolvemento de calquera outro organismo, co fin de ofrecer servizos de maior calidade e eficiencia, prestados con eficacia e xestionados de forma transparente.

Doutra banda, a moción incorpora a demanda ao goberno local para que concrete a súa proposta lexislativa. Así mesmo, demándase que publique os estudos de viabilidade e utilidade económica dos novos servizos para que a cidadanía poida coñecer as vantaxes e consecuencias dun novo ente metropolitano. A iniciativa do Grupo Municipal Socialista propón incluír os concellos de Laracha, Carballo, Cerceda e Arteixo no ente metropolitano do transporte.

Esta proposta, que veu defendendo o Grupo Municipal Socialista, concrétase agora nesta moción que defenderemos no pleno e que ten tres obxectivos claros:

1. Impulsar a creación dun ente consorciado metropolitano de transporte por estrada, baixo a fórmula de consorcio ou autoridade metropolitana, cuxa misión será coordinar e xestionar o servizo de transporte de persoas viaxeiras na cidade e no conxunto dos municipios da área, reunindo baixo unha soa autoridade administrativa a mobilidade urbana do transporte por estrada urbana, periurbana e interurbana de toda a área metropolitana da Coruña. Para a súa creación solicitarase da Xunta de Galicia a cesión das autorizacións administrativas pertinentes para o novo ente.

2. Para avanzar na conformación dunha área metropolitana, de maior alcance político e administrativo que a actual proposta referente á mobilidade, demándaselle ao Goberno Municipal a concreción do alcance dela. Concretamente coñecer, para dar máis pasos, a proposta do desenvolvemento lexislativo do novo ente, o modelo de gobernanza e toma de decisións para propoñer e un estudo de alcance, viabilidade e utilidade económica dos novos servizos que se prevén ceder e prestar polo novo ente e o custo que este supoñería. Todo iso co obxecto de lle permitir ao conxunto da cidadanía coñecer as vantaxes e as consecuencias a medio e longo prazo para os recursos públicos e o desenvolvemento da cidade da constitución dun novo ente administrativo de carácter metropolitano.

3. Convidar a formar parte do novo consorcio/autoridade metropolitana de transporte os concellos de Laracha, Carballo, Cerceda e Arteixo.