O portavoz socialista, José Manuel García, mostrou hoxe a súa satisfacción pola renovación da rúa Páramo e felicitou a veciñanza e comerciantes polo seu compromiso co barrio. Nunha visita á zona ao completarse a primeira fase dos traballos, destacou o papel fundamental da propia veciñanza e mais dos/das comerciantes para lograr este obxectivo, cunha campaña que iniciaron en 2015 coa recollida de sinaturas para mellorar a vía.

Trátase ademais dun compromiso electoral que o PSOE cumpriu despois de incorporar este proxecto ao seu programa de 2015. O PSOE xa visitou en novembro de 2017 esta rúa con motivo do inicio das obras de renovación e celebrou con comerciantes e veciñanza que este proxecto se facía realidade. Os socialistas xa visitaramos a rúa en marzo do mesmo ano para lles explicar ás persoas residentes na zona os traballos proxectados para esta vía que levaba anos demandando melloras e que agora foron atendidas. Xa entón o portavoz socialista explicou que accións coma esta demostran que é posible sumar para mellorar a calidade de vida e que o PSOE é útil para os veciños e as veciñas.

A veciñanza agradeceu unha vez máis o compromiso do Partido Socialista e o empeño demostrado nesta obra desde que en xaneiro de 2015 visitásemos a rúa para facernos eco da demanda veciñal. Veciñanza e comerciantes recolleran a finais do 2014 máis de 700 sinaturas para lle esixir ao goberno de Negreira a súa renovación. Os socialistas presentamos iniciativas ao pleno que non tiveron resposta e comprometémonos a atender esta demanda no actual mandato, polo que incluímos a obra no noso programa electoral. Foi posible facelo a través das emendas ás contas de 2016 e así o fixemos.

Despois dun longo tempo de redacción do proxecto, a obra saíu a concurso público e así se anunciou no BOP do 5 de xaneiro de 2017. Despois dunha longa tramitación, as obras comezaron en novembro de 2017. A obra tivo un orzamento de 203.401 euros e un prazo de execución de 4 meses. Os traballos consistiron na renovación da rúa, con 166 metros de lonxitude, e en completar os servizos do subsolo.

O obxectivo foi ensanchar as beirarrúas, renovadas con pavimento antiescorregadizo. As beirarrúas son de baldosa ornamental en cores vermella e gris. Mellórase a accesibilidade. Procedeuse á substitución total da calzada de vehículos. Renováronse 325 metros de bordo; 271 metros de canalización de instalacións; 600 metros cadrados de beirarrúa, e 986 metros cadrados de calzada.

Tamén se acometeu a recollida das augas pluviais e instaláronse canalizacións municipais para iluminación e outros usos. Completouse a rede de saneamento e realizáronse canalizacións subterráneas. Instaláronse bocas de rego e hidrantes.

Completouse a mellora da vía con sinalización horizontal e vertical (seguindo o estilo do barrio), coa reordenación de colectores. Ademais, plantáronse sete árbores de especies de pouco crecemento para non molestar as vivendas. Renováronse tamén as ramplas de acceso aos garaxes.