O Grupo Municipal Socialista detectou unha serie de deficiencias nos convenios coas entidades que se recollen no orzamento municipal e así llo trasladou a Marea Atlántica, que as corrixirá na Comisión de Facenda, prevista para a próxima semana, co fin de evitar que se atrase a aprobación inicial do documento.

O portavoz socialista, José Manuel García, explicou hoxe que na análise das contas, os socialistas apreciamos un erro no anexo que recolle as subvencións: o documento reproduce as cantidades do orzamento inicial de 2017 e non o documento final cos cambios introducidos nos modificativos aprobados ao longo dos últimos meses deste mesmo ano. Unha vez detectado o fallo, no prazo de 48 horas que o PSOE pediu para testar o orzamento facilitado por Marea Atlántica, trasladouse ao grupo de goberno para corrixilo.

Tal e como indicou o portavoz socialista, Marea Atlántica puxo sobre a mesa varias alternativas para corrixir o documento e finalmente optouse por aprobar os orzamentos en xunta de goberno tal e como están e levalos á Comisión de Facenda da próxima semana cunha emenda que corrixa as partidas e equilibre as contas. Desta maneira non se fai necesario atrasar a aprobación inicial no pleno previsto para o día 29 e garántese que as entidades perciban as cantidades deste ano.

José Manuel García reiterou o compromiso do PSOE de apoiar as contas neste pleno, unha vez que se corrixan as subvencións.