O mercado de San Agustín, coa súa espectacular cuberta parabólica, converteuse en todo un símbolo da modernidade da Coruña nos anos trinta. É un dos edificios máis audaces, emblemáticos e coherentes co seu destino da primeira metade do século XX.

O mercado de San Agustín é obra de dous arquitectos fundamentais para a conformación da cidade herculina do século XX, Santiago Rey Pedreira e Antonio Tenreiro, ambos os dous arquitectos municipais cando asinaron o proxecto do novo mercado no ano 1932.

Os estudos apuntan a que os arquitectos municipais inspiráronse no mercado público da cidade francesa de Reims para crear esta estrutura con cuberta parabólica, todo un reto para a Galicia dos anos trinta. En Leipzig, Alemaña, existe un mercado de similares características.

A singular cuberta parabólica do mercado está formada por unha lámina de formigón de 15 centímetros de grosor na que se incrustan bandas de vidro.

Os profesionais da arquitectura non dubidan en cualificar o mercado de San Agustín como o «Guggenheim» galego da época. Na data da súa construción foi o edificio máis innovador, moderno e tecnoloxicamente punta construído en España. O proxecto, incluída a súa singular lámina de formigón, é un milagre arquitectónico nado das mans de dous profesionais que souberon desde un recuncho do norte de España conectar directamente coa vangarda europea que se desenvolvía naqueles anos

De feito, o mercado de San Agustín é unha das tres obras da Coruña incluídas no catálogo do prestixioso Docomomo (Documentación e Conservación do Movemento Moderno), un estudo elaborado pola Fundación Mies Van der Rohe no que tamén figuran a unidade veciñal de Elviña de Corrales e a Universidade Laboral.