Establécense dous lineas subvencionables dentro da presente convocatoria.

Liña 1: Fortalecemento do movemento asociativo no ámbito da acción polos dereitos das mulleres e a non discriminación de colectivos minorizados por cuestión de orixe; diversidade cultural ou étnica; diversidade de capacidades; diversidade de expresións de xénero, identidades ou orientacións sexuais, etc. O obxecto desta liña é o de apoiar economicamente lvos gastos de funcionamento precisos para contribuír á dinamización asociativa e ao fortalecemento colectivo do movemento asociativo activo pola igualdade e a diversidade no concello da Coruña.

Liña 2: Actividades de prevención das violencias machistas en sentido amplo e atención ás vítimas, accións pola defensa do recoñecemento e os dereitos das persoas LGTBQI e accións de promoción da igualdade de xénero.

Esta liña divídese nos seguintes programas:

Liña 2.1 Fomento da igualdade de xénero e da erradicación de violencias machistas en sentido amplo cara ás mulleres e menores.

A estes efectos, enténdese por fomento da igualdade de xénero aqueles proxectos e actuacións que contribúan de forma efectiva a eliminar calquera situación existente de desigualdade por razón de xénero, contribuíndo á igualdade efectiva entre homes e mulleres.

Liña 2.2 Promoción activa e defensa dos dereitos LGTBQI (lesbianas, gais, transexuais, bisexuais, queers e intersexuais), repulsa de comportamentos baseados no odio ao non-heteronormativo e interseccionalidade con outras diversidades.

** NOTA IMPORTANTE: Poderase solicitar subvención para unha ou varias liñas e/ou programas subvencionables, que deberán ser obxecto de solicitudes independentes. No caso de presentar solicitude para máis dunha liña, programa ou actividade, a entidade solicitante deberá presentar con cada solicitude todos os anexos e documentos relacionados nas bases para cada unha delas, de forma independente.

Non poderán optar á liña 1 aquelas entidades que perciban unha axuda directa por parte do Concello da Coruña, no mesmo exercicio ao cal corresponde esta convocatoria, que teña como finalidade o financiamento dos gastos para o mantemento da entidade incluídos na base 7.2.