XXXVIII Día do Deporte na Rúa

O Concello da Coruña celebra, o domingo 15 de xuño, o XXXVIII Día do Deporte na Rúa como colofón á actividade das Escolas Deportivas Municipais do curso 2024-2025.

Todas as actividades se desenvolverán na contorna da Cidade Deportiva de Riazor. Os deportes náuticos desenvolveranse na praia de Riazor e Orzán. Todas as actividades son de balde e abertas a todas as idades e desenvolveranse en horario de mañá, de 11.00 a 14.00 horas.

A cita ten como obxectivo promocionar as diferentes disciplinas deportivas que se practican na cidade, da man dos distintos clubes e entidades deportivas municipais, e, dun xeito lúdico e participativo, achegar á cidadanía os beneficios da práctica deportiva.

O Día do Deporte na Rúa contará con 62 modalidades deportivas diferentes como o atletismo, baloncesto, bádminton, boxeo, ximnasia, escalada, marcha nórdica ou xadrez. Tamén haberá deportes náuticos como vela, piragüismo, waterpolo, paddlesurf ou surf, entre moitos outros. E como novidades contaremos con danza urbana, pickleball, pelota vasca e pentatlon militar.

Este ano, 92 clubes e entidades deportivas da cidade se suman á celebración do Día do Deporte, colaborando co Concello da Coruña co obxectivo de dar a coñecer as diferentes prácticas deportivas que se ofertan no municipio, completando unha programación deportiva ampla e diversa. Deste xeito, o Concello mantén o seu apoio ao sector deportivo da cidade, achegando o seu traballo á cidadanía e fomentando a práctica deportiva para todos os gustos e idades.

Haberá tamén unha solta de pombas ás 13.00 horas desde a explanada do Palacio dos Deportes de Riazor.

Modalidades deportivas

Entidades deportivas