A praza de María Pita acollerá este domingo, día 26, a saída da XXXI Carreira Alternativa, unha proba xa consolidada na cidade polo seu carácter participativo e inclusivo.

Organizada pola Asociación Galega de Xestión Deportiva (AGAXEDE) e co apoio do Concello da Coruña e da Deputación, a carreira dará comezo ás 11.00 horas cun percorrido de 6 quilómetros que poderá realizarse andando, correndo, en bicicleta ou en patíns, facilitando así a participación de persoas de todas as idades e condicións .

A saída estará protagonizada por Fernando Romay xunto co equipo Dépor Genuine, nun evento que pon en valor o dereito ao deporte para todas as persoas. A xornada completarase con actividades ao remate da proba e o sorteo de agasallos entre as persoas participantes.

Desde a súa creación en 1996, a Carreira Alternativa consolidouse como unha referencia do deporte inclusivo, reunindo preto de 40.000 participantes ao longo da súa traxectoria.

O concelleiro de Deportes, Manuel Vázquez, subliñou a importancia de iniciativas como esta: "Eventos como a Carreira Alternativa amosan o valor do deporte como espazo de encontro e convivencia, no que todas as persoas poden participar e compartir unha experiencia común".

O Concello da Coruña apoia este tipo de actividades que contribúen a fomentar hábitos saudables e a reforzar os valores de igualdade e inclusión na cidade.